Shillong, Nailur:
U Myntri Rangbah barim, u Dr Mukul Sangma uba dei u nongïalam ka All India Trinamool Congress (AITC) ha Meghalaya, u la pynpaw ba namar ka jinglong ka saiñ hima ha ka ri khamtam ka jingwanlang ki seng Liang Pyrshah kaba tip kum ka Indian National Develop-mental Inclusive Alliance (INDIA) la hap ban ap shwa ïa ka rai lang haba ïadei bad ka ilekshon Lok Sabha na Shillong bad Tura Lok Sabha konstitwensi.
Haba ïakren bad ki nongthoh khubor hadien ba la wai ka dorbar ha ka sngi Thohdieng, u Dr Mukul u la ong ba haba ïadei bad ka ilekshon sha Parliament bad ki jingkylla kiba jia kin rai kum kino ki rai kiba dei ban shim rai lang.
“Kumta ngi hap ban ap namar ba ka long kaei kaei kaba dang kloi ban jubab bad kan long kaba shu antad,” la ong u Dr Mukul.
Ka Shillong Lok Sabha konstitwensi ka dei kaba la mihkhmat da u Bah Vincent H Pala jong ka Congress, katba ïa ka Tura Lok Sabha konstitwensi la mihkhmat da ka Agatha K Sangma jong ka National People’s Party (NPP).
Kumta u Dr Mukul u la ong ba ïa kane ka mat yn sa ïatai ha ka por kaba biang bad ka rynsan kaba dei eh.
Kumba ka long mynta, ka TMC ka don 5 ngut ki MLA ha kane ka Ïingdorbar Thawaiñ kaba khatwei ka Jylla.
