Khliehriat, Nailur 17
Ka Meghalaya State Legal Services Authority (MSLSA), Shillong ryngkat ka jingïatreilang ka District Legal Services Authority (DLSA), East Jaiñtia Hills District, Khliehriat, ka ophis Deputy Commissioner, East Jaiñtia Hills District bad ki Block Development Officer ba kynthup ïa ka Khliehriat, Wapung & Saipung Block nalor ki tnad treikam Sorkar, ka la pynlong ïa ka ‘Mega Camp cum Awareness Programme on NALSA Schemes and Government Welfare Schemes’ halor ka phang “Bridging the Gap”.
Ïa kane ka ‘Mega Camp’ ba shi sngi kaba la pynlong ha Madan Seiñ Jait Tuber Higher Secondary School, Tuberkmai shnong la plie da u Chief Justice, High Court ka Meghalaya & Patron-in-Chief, MSLSA, Justice Sanjib Banerjee ha ka Sngi Saitjaiñ.
Ha kane ka sngi la donlang ruh u nongbishar ka High Court ka Meghalaya bad Executive Chairman, MSLSA, u Justice H.S. Thangkhiew, Registrar General, High Court ka Meghalaya cum Member Secretary, MSLSA, u E. Kharumnuid, District bad Sessions Judge cum Chairperson, District Legal Services Authority, East Jaiñtia Hills District, ka Kong C. Dkhar, Chief Judicial Magistrate cum Secretary, DLSA, East Jaiñtia Hills District, N.M. Momin, u Deputy Commissioner, East Jaiñtia Hills District, A. Baranwal, u Superintendent of Police u J.S. Dhanoa bad kiwei-kiwei.
U Chief Justice haba kren kum u kongsan u la pynpaw ka jingkmen ban ïohi da ki spah ngut ki paidbah na ki 15 tylli ki shnong ki wan shim bynta ha ka ‘Mega Camp’.
U la pynsngew ïa kiba bun ki kam sniew ha ka imlang-sahlang khamtam ka jingshah thombor ki kynthei khynnah ha ki ïing ki sem bad u la pynshlur ïa ki ba kim dei ban tieng ban wan shakhmat bad ujor namar don bun ki lad jingïarap ba la pynbiang da ka Sorkar.
U la pynshlur ruh ïa ki paidbah ban ïaleh ïa u ‘Aadhaar’ namar ha East Jaiñtia Hills la don 82% kiba don ‘Aadhaar’ bad u la kyntu ïa ki Waheh Shnong, ki nonghikai kumjuh kiba la nang la stad ban pyndap ïa ki 18% kiba dang sah namar don shibun ki jingmyntoi da kaba don ïa u ‘Aadhaar’.
U Justice Sanjib Banerjee u la kren ruh halor ka jingshah ktah ka imlang-sahlang na ka jingpyndonkam ïa u drok bad u la ong ba ka donkam ka jingïatreilang na baroh ban jop ïa kane ka jingpang kaba la rung sha ki shnong.
Ha kaba ïadei bad ka jingtih dewiong ba long pyrshah ïa ka aiñ kaba tip kum ka ‘Illegal Rat Hole Mining’, u Chief Justice u la kyntu ïa ki paidbah ban kiar na kine ki jait kam namar ka Sorkar ka la sdang da ka ‘Scientific Coal Mining’. U la kyntu ruh ïa ka Sorkar ban pyntikna ba ki Co-operative Society jong ki nongshong shnong dei ban shah ïa ki ban ïaleh ïa ki ‘License’ ban tih dewïong.
U Justice H.S. Thangkhiew ha ka jingkren u la kyntu ïa ki Para Legal Volunteer (PLV) kiba don ha ki shnong ki thaw ban ai ka jingïarap bad ban pyntikna ba baroh kim dei ban duh ïa ka hok jong ki.
Ha ka jingïalang la sam ruh ïa ki tiar ïarap (Aids and Assistive Devices) sha kito kiba don jingduna ha ki dkhot met kiba ïoh jingmyntoi hapoh ka PMAY-G Scheme.
Ha kane ka sngi la pynlong ruh ïa ka ‘Free Health Check-up’, ka jingpynrung kyrteng hapoh ka MHIS, Adhaar, EPIC bad E-Shram bad la don ruh ka jingpynshai halor kiba bun ki skhim Sorkar kum na ka tnad ka rep ka riang, Horticulture, Social Welfare, tnad dohkha-dohpnat, Commerce & Industries, Animal Husbandry & Veterinary.
La don ruh ka ïew ïadie ïathied ïa ki mar ki mata ba la shna bad pynmih da ki Self Help Group (SHG) ka District.
