Shillong, Nailur:
Ki nongïalam jong ka Hynñiewtrep Achik National Movement (HANM) ki la pynpaw ïa ka jingpyrshah ha kaba ïadei bad ka jingthmu jong ka sorkar National Democratic Alliance (NDA) hapoh ka jingïalam jong ka Bharatiya Janata Party (BJP) ban pynkylla kyrteng noh ïa ka Ri India sha ka Bharat.
Haba kren bad ki lad pathai khubor ha Shillong Press Club ha ka Sngi Palei, u President ka HANM, u Bah Lamphrang Kharbani u la ong ba ka seng hi ka pynpaw ïa ka jingpyrshah jur bad ka jingbym ïahap ïa ka jingthmu jong ka sorkar BJP hapoh ka jingïalam jong u Myntri Rangbahduh ka ri, u Narendra Modi ban pynkylla ïa ka kyrteng India sha ka Bharat namar ka ktien Bharat ka long pyrshah ïa ki jingthmu kiba la pruid dak ha ka riti synshar.
U la ong ba ka pyrthei baroh kawei ka tip bad ithuh ïa ka ri jong ngi kum ka Ri India bad kumta ban pynkylla kyrteng ïa ka kan ktah shikatdei eh bad ka pynpaw kumba ki thew sha ka ñiam.
U la ong ruh ba ha ka Article-1 jong ka riti synshar ka ri, ka kren shai ba ka India ka dei ka Bharat bad kumta ka seng ka ïohi ba ka dei kane ka daw kaba la ïalam bakla bad pynkulmar jingmut.
Na ka liang ka seng ka la kyntu jur ïa baroh ki MP jong ka Ri ba ki dei ban pyrshah ïa kane ka jingthmu jong ka BJP ban pynkylla ïa ka kyrteng wanrah noh ïa ka jingpynkylla bad ban weng noh ïa ka ktien Bharat na ka riti synshar ka ri bad ban pynneh ïa ka ktien India.
“Lada ka long ha kane ka dur, ka HANM ka kren da kaba shai ba lada ka sorkar India ka ïaid beit shakhmat ban pynkylla ïa ka India sha ka Bharat bad ka sorkar India ka kheiñ troiñ noh ïa ki 564 tylli ki hima bad ka burom noh tang ïa kawei ka hima, ka jingkhih phaloh bad ka jingkhihwin kan sa jia ha kane ka Ri India baroh kawei”, la ong u Bah Kharbani.
Shuh shuh na ka liang ki nongïalam ka seng ki la pyntip ruh ba shen kin sa phah da ka jingthoh sha ki MP ban pynsngew halor kane ka jingdawa jong ki.
