New Delhi, Nailur 17
Uwei u shipai langrut u la shah pynïap hadien ba u la shah rahbor na la ïing ha kawei ka shnong kaba don ha ka jylla Manipur.
Ïa utei u shipai la tip kyrteng kum u Serto Thangthang Kom, bad u la wan ïing hadien ba u la shim shuti. U Serto u la shah rahbor na ka ïing sah jong u kaba don ha Imphal West distrik ha ka Sngi Saitjaiñ, bad ïa ka met kaba sah jong u la lap ha ka step Sngi U Blei.
Katkum ki khubor, u Serto u la shah rahbor ha ki briew kiba la kieng atiar bad ki bym ithuh satia ha ka por kumba 10 baje mynstep hynnin ka sngi. Katkum ka jingïathuh jong u khun jong u uba dang 10 snem ka rta, lai ngut ki briew ki la wan rung ha ka ïing sah jong ki katba u kpa bad ma u ki dang ïa treikam ha phyllaw ïing.
Kita ki lai ngut ki la buh da ka tiar siat ha khlieh jong u Serto bad ki la rahbor bad pynshong ïa u ha kawei ka kali rong lieh, la ïathuh utei u khun ba dang 10 snem ka rta ha ki pulit.
Ïa ka met jong utei u shipai la lap na ka shnong Khuningthek, kaba don ha Mihngi jong ka Mongjam ha Imphal East. Hadien ba la lap ïa ka met, u para lem bad u kynum jong u ki la wan shakhmat ban kam ïa ka met. La ong ba la don dak shi kuli na ki bynta jong ka khlieh jong utei u shipai.
Une u shipai u la iehnoh shadien ïa la ka kurim bad arngut ki khun.
Ha u kyrwoh ha rynsan ‘X’, ka Spear Corps jong ki shipai India ka la kynmaw burom ïa utei u shipai uba la duh noh ïa la ka jingim.
“U Serto u la don mynshwa bad ka Assam Regiment jong ka Indian Army bad mynta u don bad ka DSC Platoon ha Leimakhong Military Station. U la don hapdeng ka shuti ha ka por ba katei ka jingjia ka la jia ha Imphal West,” la ong ka Spear Corps.
Ha kum kane ka por, ka Spear Corps ka la ong ba ki shipai India ki ïeng ha syndah jong ka ïing ka sem kaba la duh noh ïa utei u shipai, bad kin peit ïa ka bha ka miat bad ka jinglong shngaiñ jong ki dkhot ka ïing ka sem.
