Shillong, Nailur 18
Ka sap ka phong ka dei shibynta na ka jingim jong ki briew bad haba ki samla ha kane ka juk kaba mynta ki pyndonkam hok ïa ka sap kaba ki don khlem da pynlehnohei, ym tang ba ki wanrah nam ïa ka ïing ka sem jong ki hynrei ki wanrah nam ruh ïa ka jylla hi baroh kawei.
Ka long kaei kaei kaba sngewsarong bad ruh kaba ngi lah ban ong kaba wanrah ïa ka jingkmen kaba khraw ban ïohi ba ki paid Khasi bad Jaiñtia ki la kiew shaphrang ha baroh ki liang la ka long ha ka rwai ka siaw, ka put ka tem, ka thoh kot thoh sla bad kiwei kiwei ki sap kiba kyrpang kiba ki don.
Ka Mansa Najiar kaba dang 12 snem ka rta bad kaba dang shong klas VII-A ha B.K. Bajoria Higher Secondary School ka dei ka khun jong ka Kong Marleki Najiar bad u Bah Felix Pakynteiñ kiba shong ba sah ha Nongmensong. Kane khynnah ka la wanrah nam ïa ka ïing ka sem lajong bad ïa ka jylla hi baroh kawei hadien ba ka la ïohpdiang ïa ki khusnam bapher bapher namar ka jingthoh jong ka ïa ka kot bad hadien ba ka la shah jied ha ka rynsan thoh kot bad pynmih kot jong ki khynnah rit kaba paw bha hapoh ka pyrthei ïa kaba la tip kyrteng kum ka Bribooks kaba la jied ïa ka kot jong katei ka khynnah ban die ha kylleng ka pyrthei. Ka Mansa napdeng ki 200 ngut ki khynnah, ka la ïoh ruh ïa ka kyrdan kaba 190.
Ka kompani BriBooks ka dei ka rynsan kaba ailad bad pynshlur ïa ki khynnah ba kin thoh, ban pynmih bad die ïa ki kot jong ki ha ki rynsan bapher bapher. Hadien ba katei ka kompani ka la jied ïa ka kot jong ka Mansa ban ai khusnam bad ka pyntip ruh sha ki kmie ki kpa jong ka Mansa ba kin kyntiew da kaba die ïa ka kot jong katei ka khynnah khnang ba kan lah ban ïoh shuh shuh ïa ki khusnam bapher bapher ha kaba katei ka khynnah ka la lah ban die haduh kumba 40 tylli tam ki kot jong ka.
Ka Mansa ka la leit ban shim ïa katei ka khusnam na Gurugram, Haryana ha ryngkat ka jingsynran lem ki kmie ki kpa bad ki bahaïing bahasem jong ka ha kine ki sngi kiba dang shu dep.
Kaei kaba kham pynsngewsarong shuh shuh ïa ka jylla ka long ba napdeng kiwei kiwei pat ki khynnah skul napoh kane ka jylla kiba la ïashimbynta ha katei ka jingïakhun, ka dei tang ka Mansa marwei kaba la shah jied ban ïohpdiang ïa katei ka khusnam na ka kompani Bribooks.
Ka kyrteng jong ka kot kaba ka Mansa ka la thoh ka dei ïa kaba la tip kyrteng kum ka “A Hero’s Destiny, Everland” bad ka la shimpor ban pyndep ban thoh ïa katei ka kot tang hapoh 4-5 sngi eiei.
Katei ka kot ka dei shaphang kawei ka khynnah kaba la ïaleh bad ïakhun pyrshah bad uwei u nongshun uba thmu ban knieh jubor bad synshar donbor ïa ka jaka kaba ki kmie ki kpa jong katei ka khynnah ki dei hok ki trai bad ki nongsynshar jong katei ka jaka bad kitei ki nongshun ki thmu ban pynpra pynjot ïa katei ka jaka. Kumta hadien kata katei ka khynnah kynthei ka la ïakhun ban wad ki lad ki lynti kumno ban pynrem ïa kitei u nongshun hynrei ha kaba khadduh katei ka khynnah khynthei ha katei ka jingïakhun ka la jop bad pyllait ïa katei ka jaka na ka jingshah pynjot bad synshar donbor ha kitei ki riewsniew.
Ka Mansa ka la ïathuh ba ka dap da ka jingsngewkmen kaba khraw bha ban ïoh kheit ïa utei u soh ka jingjop. Nangta ka la ïathuh ba ha ka por ba ka thoh ïa katei ka kot ka khlem pan jingïarap satia nangno-nangno hynrei ka la ïaleh ban thoh hi da ka jingstad bad ka jingshemphang lade. Katei ka khynnnah ka la ïoh mynsiem ban thoh ïa katei ka kot ka dei lyngba kiba bun ki liang khamtam ha ka rukom long rukom man jong kane ka pyrthei kaba mynta bad kumta ka la pynlong ïa ka ba kan pyrkhat jngai bad wanrah ïa ki jingmut jingpyrkhat kiba kham pher.
Ka Mansa ka la ïathuh ruh ba ka ju ïoh mynsiem bha na kawei ka nongthoh kot ka pyrthei kaba pawnam bha ïa kaba la tip kyrteng kum ka J.K Rowling bad katei ka nongthoh kot ym tang ba ka thoh kot hynrei ka ïaleh ruh kumno ban thaw ki lad ki lynti ban ïohlum pisa ban ai na ka bynta ki khynnah kiba duk.
Ka la ïathuh ba nangne shakhmat ruh kan dang ïai thoh bad pynmih shuh shuh ïa ki kot jong ka bad ka la ai mynsiem ruh ïa kiwei pat ki para khynnah ba ki dei ban long pdiang kumba ki long bad ba ki dei ban pynphriang ïa ki khubor jong ki lyngba ka jingieid.
“Phi dei ban long bad pdiang kumba phi long, phi dei ban pynsaphriang ïa ka khubor jong phi lyngba ka jingieid”, la ai mynsiem ka Mansa ïa ki para khynnah.
Na ka liang ka kmie jong katei ka khynnah, ka Kong Marleki Najiar, ka la ainguh nyngkong eh ïa U Blei uba la wanrah ka nam ka burom ïa ka ïing ka sem bad ka jylla baroh kawei lyngba ka khun jong ki bad ka Kong Najiar ka la pynpaw ba kam lah ban mutdur ba ka khun jong ka, kan poi shaduh katei ka thong.
Ka Kong Marleki ka la phah ruh ïa ka khubor sha kiwei ki kmie ki kpa ba haba ki khun jong ki, ki don ïa kano kano ka sap kaba kyrpang ki dei ban ïarap bad ai mynsiem ïa ki ryngkat ka jingsneng jingkraw bad ka jingpyni ba kin ïaid ha ka lynti kaba bha ban tip ïa ka akor ka burom ym ban shu iehnoh ïa ki hynrei ban ïarap ïa ki ba kin poi sha ka thong kaba ki kwah khamtam ha kane ka pyrthei kaba mynta.
“Ba kin poi ki khun sha ka thong, ka donkam ïa ki kmie ki kpa ba kin ïarap ïa ki khun jong ki ha kano kano ka sap kaba ki don”, la ong ka Kong Najiar.
Na ka liang u kpa jong ka Mansa, u Bah Felix Pakynteiñ, u la ong ba ka long kaba donkam ba ki kmie ki kpa kin ïalam bad btin lynti ïa ki khun ym ba kin ieh ïa ki namar haba ki kmie ki kpa ki ieh ïa ki khun, ki khun ki sakma.
“Lada phi ieh ïa ki khun, ki long sakma noh hynrei lada phi don lang bad ki ka pher bha bad kum ki kmie ki kpa ki donkam ban btin lynti ïa ki khun bad hap ban ïalong paralok bad ki”, la ong u kpa jong ka Mansa.
Na ka liang u kñi jong katei ka khynnah, u Bah Lupher Najiar, u la ong ba ka long kaba sngewtynnad ba ka Mansa ka pyndonkam hok ïa ki jingai jingmyntoi lyngba ki kor ki bor jong kane ka juk kaba mynta ban pyntbit shuh shuh ïa ka sap kaba ka don.
“Ki bun ki khynnah kiba don lehse ïa ka sap hynrei kim ïoh ïa ka lad lane kim shimkhia lane kim ïoh ïa kano kano ka jingkyrshan na ka liang ka ïing ka sem bad ka la shu duh noh kumto”, la ong u Bah Najiar.
Ïa ka kot jong ka Mansa yn lah ban ïoh na BriBooks.com lane ki paidbah ki lah ban thied lyngba ka Google da kaba thoh ïa ka kyrteng jong katei ka kot ba ka la thoh.
Hynrei kaba sngewsih ka long ruh pat ba wat la katei ka khynnah ka la wanrah nam shikatdei eh ïa ka jylla hynrei kam pat shym la don kano kano ka jingpynkup burom ïa katei ka khynnah da kano kano ka kynhun lane da ka sorkar.
