Shillong, Nailur 18
Kiba trei ha Secretariat bad pyndonkam da ka ‘card’ ban shon ha ka por ba ki wan trei bad ynda la wai trei, mynta ki hap ban siew T.500 na ka bynta ban ïoh da kawei pat ka card lada ki kum pynjah ne buh bakla ïa ka khlem lap shuh.
Kane ka jingbuh dor haduh T.500 ban ïoh da kawei pat ka card ka dei ka dor kaba heh bha.
Katkum ka jingbthah kaba la pynmih da ka Secretariat Administration Department, la ong ba kito kiba don ka Access Control System (ACS) card ki dei ban pyntip sha SAD (Establishment) ha ka por ba long trei na ka bynta ban pynim biang (re-activate) ïa ka ACS card bad ïa ka ACS card kaba thymmai yn ai sha ki ophisar bad nongtrei jong ka Meghalaya (Civil) Secretariat ki bym pat don ïa ka card.
Hynrei lada kito kiba la don ka ACS card ki kum pynjah ne kum buh bakla khlem lap shuh, ki hap ban siew T.500 na ka bynta ban ïoh da kawei pat ka ACS card.
Ïa ka ACS card ha Secretariat la sdang pyntreikam biang naduh ka 1 tarik Jylliew, 2022 hadien ba la pynsangeh teng ha ka por COVID-19.
Ïa kane ka mashin kaba plie bad khang ïa ki jaka rung jaka mih ha Secretariat la pyndonkam bha ha Main Secretariat bad Additional Secretariat.
Pynban ha kiwei pat ki ophis Sorkar ym shym la pyntreikam ryntih ïa kane bad ki don ki ophis Sorkar kiba la dep pyndait ïa ka ACS mashin ha jaka rung bad jaka mih, hynrei ki don kiba khlem pyntreikam.
Ïa kane ka mashin ACS card la pyntreikam da ka kompani Nice Infotech.
