Shillong, Nailur 18
Hadien ba ki lad pathai khubor na nongbah New Delhi ki la pynbna ba ka sorkar u Narendra Modi ha ka miet jong ka Lah Sngi U Blei ka la ai jingmynjur ïa ka aiñ rew ban bhah 33% ki konstitwensi Lok Sabha bad Ïingdorbar Thawaiñ ki jylla ïa ki kynthei, ki la don ki jingkylli kaei ka ban jia ha Meghalaya lada long aiñ kane ka jingai bhah kyrpang.
Ka Meghalaya ka don 60 tylli ki konstitwensi ha kaba 55 tylli la bhah ïa ki Scheduled Tribe katba san tylli la pynlong ïa ki kum kita ki ‘General’ konstitwensi ha kaba wat ki bym dei ki Scheduled Tribe ki lah ban ïakhun.
Lada katei ka aiñ rew kaba ai bhah kyrpang ïa ki kynthei ka treikam pura, na ki 60 tylli ki konstitwensi, 19.8 lane 20 tylli ki konstitwensi kin leit sha ki kynthei.
Kumba ka long mynta, ka Ïingdorbar Thawaiñ ka jylla ka don tang lai ngut ki kynthei kiba long kum ki MLA – Kong Ampareen Lyngdoh, Kong Santa Mary Shylla bad ka Miani D Shira. Namarkata, ka jylla kam pat kot satia sha kata ka 33% lada shim ba katei ka aiñ rew ban ai bhah kyrpang ïa ki kynthei ka treikam shisha.
Ha ka Ïingdorbar Thawaiñ Lok Sabha kaba mynta, 78 ngut ki MP ki dei ki kynthei bad namarkata, ki dang duna wat ïa ka 15% ha ka Dorbar kaba don 543 ngut ki dkhot.
Ha Rajya Sabha ruh, ka jingdon ki kynthei kiba dei ki MP ka long tang kumba 14%, bad kane ka long katkum ki jingkheiñ ba la ai da ka sorkar ha Parliament ha u Nohprah 2022.
