Shillong, Nailur 18
U Superintendent of Police (SP) ka East Khasi Hills u Bah Sylvester Nongtnger u la ong ba kam don kano-kano ka jingma ïa ka jingim briew ne ïa kino-kino ki tiar na u ‘Stunt Grenade’ hynrei u dei tang uba pynsat khmat.
Ïa kane u SP u la pynpaw hadien ba ka la mih ka jingpynrem kaba jur ïa uwei u pulit tap jaiñ ïong halor ka jingkawang ïa u ‘stunt grenade’ ne u bom pynsat khmat ha kawei ka dukan sha kaba don mar pyrshah ïa ka SBI Main Branch.
U SP u la ong ba kum ki pulit kin nym lah ban kem ïa ki briew kiba la ïalum da ki spah ngut. Kumta ban pynpra ïa u paidbah hap ban pyndonkam da u bom pynsat khmat, bad na ka liang jong ki pulit ruh kim shym la kawang hynrei ban shu pyntyllun na madan.
Shuh shuh u la ong ba ha kaba ïadei bad ka jingjia ha katei ka dukan sha ruh, kam dei satia ba la kawang ïa u bom pynsat khmat sha kane ka dukan, hynrei na ka liang ki pulit ki la shu pyntyllun bad sniew bok ba ka jingkhang ne ‘shutter’ jong kane ka dukan, kam shym la hap lut sha baroh bad lait thliew khyndiat bad kumta ha kane ka jingpyntyllun ïa u bom pynsat khmat, u la leit rung shapoh kane ka dukan.
Ha kawei pat ka liang, u SP u la ïathuh ba kaei kaba la jia ha ka 4 tarik mynta u bnai, kam dei satia kaba la leh donbor hynrei namar ka jingleh pyrshah jong ki dkhot ka HITO, na ka liang ki pulit kim banse ban shim ki sienjam ban khanglad ïa ki ban tur sha Secretariat ba kin leit bret ïa ki placard ki jong ki.
Ha kane ka sngi, ka la don ka jingshah khot hajir jong u President ka HITO u Bah Donbok Dkhar, hynrei ha ka jaka ba un wan marwei, la ïohi ba u la lum da ki spah ngut ki dkhot bad ban leit tur sha thanat Sadar ryngkat ka jingpynmih ki ktien khlem akor hynrei wat la katta ki pulit kim shym la leh eiei hynrei ban pynjai jai katba lah bad ha kaba la shah ban synran ïa ki 6 ngut ïa u President, la ong u SP.
U la ong, hynrei ynda ki la mih bad haba la bthah ba kin leit phai noh sha la ki ïing, kim shym la sngap bad pyrshang ban tur donbor sha Secretariat. “Ngim lah ban shah satia ba kin tur, namar na ka liang ki bor district ki la pynjari da ka kyndon 144 CrPC, kumta ngi la hap ban khang noh hynrei namar ka jingleh da ka bor, ngim banse ban khyrwit lathi bad pyndonkam bom pynsat khmat,” la ong u SP.
