Jowai, Nailur 18
Uwei u briew ïa uba la tip kyrteng kum u Khrawkupar Phawa ba la 30 snem na ka shnong Sohmynting u la khlad hashen hadien ba ka trok kaba u ñiah ka la thung baji sha synrang hajan Yingkien Moo ha Iawmusiang, Jowai ha ka miet 17 tarik Nailur.
Kane ka trok dei kaba don ïa u registration number AS01-FC-8513, ka la hap ha ka jaka ba long khun bha ka surok kaba don hajan ka petrol pump Challam Syngkon, ha ka bynta jong ka surok Shillong-Jowai.
Ha kane ka jingjia, ka trok ka la tynrah ruh ïa ka ïing kaba dei ka dukan shna shaka. Ka khubor ka ïathuh ba ha kane ka dukan shna shaka ym don briew mano-mano ha kane ka por ba jia.
Ki pulit ryngkat ka jingïarap jong ki paidbah ki la lah ban sei noh ïa ka met jong u Khrawkupar napoh ka trok ha ka por kumba 2.30 nohphai sngi. Ki pulit ki la shimti ïa ka metiap bad ka jingtohkit halor kane ka jingjia ka la ïaid shakhmat.
