Nongstoiñ, Nailur 18
Ki bahaïing hasem ka samla ba dang 23 snem ka rta ki la tep noh ïa ka met kaba sah jong ka ha ka Lah Sngi U Blei ha ka shnong Lejadubi, West Khasi Hills.
Kane ka samla ïa kaba la tip kyrteng kum ka Tangsi K Sangma ka la khlad hadien ba ka la hap na ka ïing kaba hynriew mala ha Guwahati ha ka janmiet jong ka Sngi Saitjaiñ.
Na ka liang ka FKJGP Aradonga Area Unit ka la pyntip ba ki bahaïing hasem jong katei ka samla ki suba jur ba ka khun jong ki ka la shah pynïap dusmon.
Katkum ka jingtip ba la ïohlum, la ong ba ka samla Tangsi ka dang shu pyndep ia ka jingpule LLB bad ka la leit sah ha ka ïing wai ba la tip kum ka Subansiri Apartment ha Guwahati.
Hynrei ha ka por 4:30 janmiet jong ka sngi Saitjaiñ, katei ka samla ka la khlad noh hadien ba ka la hap na ka jaka ba ka sah kaba don ha ka mala kaba hynriew.
Kumta na ka liang ki pulit ki la kit noh ïa ka met jong kane ka samla sha kawei ka hospital ha Guwahati ban leh ïa ka post mortem. Hadien kata pat ki la aiti noh sha ki bahaïing hasem ban pyndep ïa kaba dang sah. Mynta ka sngi ki bahaïing hasem ki la tep noh ïa ka met kaba sah jong kane ka samla ha u lum jingtep ka Balang Baptist ha Lejadubi.
U President ka FKJGP Aradonga Area Unit u Triling D Shira u la dawa na ka sorkar Assam bad ka tnat pulit ba kin leh da ka jingtohkit kaba thikna halor ka jingïap jong katei ka samla. U la ong ba kiba bun na ki bahaïing hasem jong katei ka samla ki la suba jur ba ka la shah pynïap. Namarkata, u la kyntu lang ïa ka sorkar Meghalaya ba kan shimkhia halor kane ka jingjia.
