Shillong, Nailur 18
Ki lad pathai khubor na ri thor ha ka miet Lah Sngi U Blei ki la pynbna ba ka Kynhun Myntri lane ‘Cabinet’ jong u Narendra Modi ka la shong jingïalang ban ai jingmynjur ïa ka aiñ rew ban bhah 33% ki konstitwensi Lok Sabha bad ki Ïingdorbar Thawaiñ ki jylla ïa ki kynthei.
Hynrei kaba kum kata ka jingpynbna kam pat shym la wan satia na ka liang ka sorkar na ka daw ba ym shym la pynlong satia ïa ka jingïalang bad ki lad pathai khubor hadien ba la wai ka jingïakynduh ka Kynhun Myntri.
Ki khubor na nongbah New Delhi ki ïathuh ruh ba hadien ba la ai jingmynjur da ka Kynhun Myntri, ïa katei ka aiñ rew yn sa wanrah shen ha Dorbar Parliament.
Mar ïa pynbna ba kan don ka jingïalang ka Kynhun Myntri mynta ka janmiet ha ka por 6:30, kaba dei ruh ka sngi sdang jong ka Dorbar Kyrpang ka Parliament, kiba bun ki la ap khmih lynti aïu ka sorkar u Modi kan pynbna. Hynrei kam shym la don satia kano-kano ka jingpynbna ne jingpyntip.
Tangba ha kane ka sngi, ki la don ki jingïalang hapdeng ki Myntri kum u Piyush Goyal bad Pralhad Joshi bad u Amit Shah bad kumjuh ruh bad u President ka BJP, u JP Nadda.
Ka la don ka jingtharai ba ka Kynhun Myntri kan ai jingmynjur halor katei ka aiñ ban bhah kyrpang 33% ïa ki kynthei ha ki konstitwensi Lok Sabha bad Ïingdorbar Thawaiñ lane ban ai bhah ïa ki Other Backward Classes lane ban wanrah da ka aiñ ban pynlong beit tang kawei ka ilekshon lane ban wanrah ïa ka aiñ rew ban pynkylla ïa ka kyrteng jong ka Ri na ka India sha ka Bharat.
Hynrei ki lad pathai khubor na nongbah New Delhi ki la pyntip ba katkum ki tyllong khubor, ka Kynhun Myntri ka la ai jingmynjur ban wanrah ïa ka aiñ rew kaba ïadei bad ka jingbhah 33% ïa ki konstitwensi Lok Sabha bad Ïingdorbar Thawaiñ.
Kane ka aiñ rew, ba la pynkhreh ha u snem 2008, ka la shu sah kumto naduh ba ka Rajya Sabha ka la ai jingmynjur ha u snem 2010. Hynrei ïa kane ka aiñ rew ym shym la wanrah satia hapoh ka Lok Sabha.
Wat la ka BJP bad ka Congress ki la ju kyrshan ïa katei ka aiñ rew, hynrei ki la don ki jingpyrshah na kiwei pat ki seng bad ki jingdawa ban ai bhah lem ïa ki kynhun ba dang sahdien hapoh kane hi ka aiñ rew.
