Resubelpara, Nailur 18
Uwei u kontraktor na Tura, West Garo Hills (WGH), u Tarseng Sangma, u la ujor mukotduma pyrshah ïa ka SDO ka Bajengdoba, ka Kedia G. Momin, halor ki jingkynnoh pan pisa na u ban pyllait ïa ka pisa kaba ka tnad ka dei ban siew sha u.
U Tarseng, ha shuwa, uba la dep ujor ejahar pyrshah ïa katei u SDO u la leit tied ruh ïa ka jingkhang ka ïingbishar ka Jylla ban kyrpad pynbeit ïa ka mukotduma jong u. Ïa katei ka ejahar la ujor ha Bajengdoba PS mynta u bnai.
Ha kawei ka liang, katei ka SDO lyngba u muktiar jong ka, ha ka 1 tarik mynta u bnai ka la pan por artaïew ban pynkhreh ïa ka ‘affidavit’.
Katei ka kam ka dei halor ka projek Jal Jeevan Mission (JJM) ba la shim bad pyndep da u Tarseng ïa kaba ka kylla khatduh jong ka ‘Bill’ kaba T.74,64,200 na bynta katei ka projek ha ka shnong Akemgre hapoh Bajengdoba, NGH. Ïa ka ‘work order’ sha utei u kontraktor la ai ha ka 10 tarik Lber, 2022.
“Katei ka kam ka dei halor ka ‘Pre Sedimentation Tank’ na bynta ka projek hapoh Akembre. Nga la pyndep ïa ka kam bad nga la aiti ïa ka kaiphod halor ka jingpyndep ïa ka kam sha ka tnad. Nalor kane, ïa ka kam la wan jurip da ka kynhun ba-lai ha ka 5 tarik Jymmang, 2023 kaba la kdew shai ba ka kam ka la dep pura,” ong u Tarseng.
Hadien ka jingpyndep ïa ka projek, u kontraktor u la leit mih sha ka SDO ban pynkhuid noh ïa ka pisa ba dang sah sha u hynrei u la kyndit haba u la shah pan pisa kaba palat 1 lak tyngka ban pynkhuid ïa ka jingsiew jong u.
“Ka la kam ba ka donkam ïa ka pisa kum ka bai-lut bai-sep ban pyllait ïa ka ‘Bill’ jong nga. Namar ka jingduna pisa, nga la kyrpad ïa ka ban shim T.30,000 ïa kaba ka la mynjur bad kular ïa nga ba yn sa pyllait noh ïa ka ‘Bill’ jong nga ha ki 2-3 sngi ban wan. Nga la phah ïa ka pisa sha ka ‘account’ jong ka lyngba ka ‘Google Pay’ ha ka 10 tarik Nailar hynrei kaba lyngngoh ka long ba haduh mynta, ym pat pyllait ïa ka ‘Bill’ jong nga,” la ong u nongujor.
“Ha katei ka sngi, nga dang pyrkhat ba ki ophisar ki lah ban don ka hok ban dawa pisa na bynta ka jingshakri jong ki. Ka la pynbor ïa nga ba ngan siew lym kumta yn ym pyllait ïa ka ‘Bill’ jong nga. Nga la dep siew hynrei ka kyntait ban pyllait ïa ka ‘Bill’ jong nga da kaba ai daw kumne-kumtai. Kumta, nga dawa tohkit halor kane ka kam bad ka jingpynshitom pyrshah ïa katei ka ophisar halor ka jingdon bynta jong ka ha ka bamsap bad ki jingleh bym hok,” ong ka ejahar.
Lyngba ka kyrwoh ha ka Lah Sngi U Blei, u Tarseng u la kynnoh ba ka SDO ka ju die ïa ki kam kontrak sha kito kiba kham lah ban siew bun ïa ka.
U la kdew ruh ïa ka projek ha Sualmari hapoh Bajengdoba ïa kaba la ai nyngkong sha uwei u kontraktor na Williamnagar hashuwa ban pyndam ïa ka da ka Kedia. Ïa kane ka kam hadien la ai sha u Tarseng. U la kynnoh biang ba sa shisien, ka kam kaba la dei ban ai sha u, la ai noh sha kawei pat ka kynhun watla la phah nyngkong ïa ki kyrteng jong ki.
