Mawkyrwat, Nailur 18
U District Magistrate jong ka South West Khasi Hills District, Mawkyrwat, ha ka hukum ba la pynmih hapoh ka section 144 CrPC u la khang ïa baroh ki jait jingïakob khwai dohkha bad ki jingïalang paidbah ha ki pung dohkha kiba don hapoh 500 metre ka jingjngai na ki surok PWD (Roads).
Ïa kane ka hukum la pyntreikam namar ba la ïoh jingtip ba don katto katne ki ’riewshimet bad ki kynhun kiba ju mlien ba pynïaid ïa ki jingïakob khwai dohkha bad jingïalang paidbah ha ki pung dohkha kiba don hajan ki surok PWD (Roads), kaba pynthut ïa ka ïaid ka ïeng ki kali bad ruh ïa ka ïaid ka ïeng jong ki briew.
Kino kino briew kiba shah ktah na kane ka hukum kin sngewbha ban leit mih sha ka shlem treikam u District Magistrate ka South West Khasi District, Mawkyrwat lane sha kino kino ki bor ba dei khmih.
Kane ka hukum kan treikam mardor tat ynda pynbna da kumwei pat.
