Shillong, Nailur 18
Ka Khasi Students’ Union (KSU) ha ka Lah Sngi U Blei ka la dawa na ka Sorkar Jylla ba kan weng noh mardor ïa ki ktem beaiñ jong ki shipai Border Security Force (BSF) kiba don ha Sonapyrdi, Ratacherra bad Hingaria bad ban buh shuh shuh ïa ki khyrdop talasi mynder ha ka National Highway-6 ha East Jaiñtia Hills District.
Ha ka dorkhas ba la phah sha u Symbud Myntri Rangbah ba khmih ïa ka tnat Pohïing u Bah Prestone Tynsong, u President ka KSU-EJH u samla Streamly N Suchen u la ong, “Ngi kyrpad ban leh eiei noh mardor ha kaban weng ïa kine ki ktem beaiñ jong ki BSF bad ban leit buh noh sha ki jaka khappud ba kyndong eh ka Ri bad ruh ban shimkhia ïa ki kam thombor bad ban tynrong ïa ka jingkitkhlieh ïa ki kam ba ki la leh”.
“Ngi kyrmen ba phin shim ïa ki sienjam ha kaban weng noh ïa ki jingeh ba la mad da ki paidbah kiba shong ba sah marjan kine ki ktem BSF ha Sonapyrdi, Ratacherra bad Hingaria,” u la ong.
Shuh shuh u la ong ba ki don shibun ki jingujor ba ka seng ka la ïohpdiang halor ka jingleh donbor bad jrong kti jong ki shipai BSF ha ki jaka ba marjan jong ka surok NH-6.
Nalor kane, u samla Streamly u la ong ba ha ka 2 tarik Lber, 2023, ka kynhun ki shipai BSF ba phong uniform pura bad ba kieng suloi, ki la thombor ïa uwei u samla pule ka shnong Huroi katba u dang ïaid lynti sha skul.
“Kane ka jingjia ka la pynsngew ’langkñia ïa ki nongshong shnong bad pynim ïa ki hapdeng ka jingsyier. Kane ka kam ka la pynlong ïa ki nongshong shnong bad ka seng ban pynrem jur ïa ki shipai BSF bad la don bun ki khep ruh ba ki shipai BSF ki la pyrshang ban pyntieng pynsmiej bad pyni bor ïa ki nongshong shnong,” u la bynrap.
U ong ba ki jingthombor jong ki shipai BSF ki kynthup na ka jingtohkit khlem daw, ka jingtalasi ïa ki kali ba jia man ka por bad ka jingbym burom satia ïa ki trai shnong. Kine ki kam ki la wanrah ïa ka jingsngew tieng bad rit mynsiem hapdeng ki nongshong shnong, kaba la ktah jur ruh ïa ka jingim jong ki ba manla ka sngi bad ka bha ka miat baroh lang.
Ha kajuh ka por, ka KSU-EJH ka la dawa na ka Sorkar Jylla ban buh shuh shuh ïa ka Anti Infiltration Check Gate ha ka surok NH-6 khamtam ha Tongseng khnang ban tehlakam ïa ka jingwan rung kyrthep ki mynder kiba dei na Bangladesh.
U la pyntip ruh ba ka KSU Narpuh Circle dang shen ka la ïoh bat ïa ka jingwan rung ki nong Bangladesh na khlaw Kuiang hadien ba ki jam na shiliang u pud u sam ka Ri.
U samla Streamly u la ong ba ki la bun ki khep ba ka seng bad ka Dorbar Shnong, ki la ïoh ban bat ïa ki nong Bangladesh ba wan rung tuh bad kine mynta ki la shah pynngat ha ki kyndon bapher bapher jong ka aiñ.
Halor ka jingshah pynïap kawei ka longkmie ha ki nong Bangladesh, u samla Streamly u la ong ba lyngba ka jingai sakhi jong ki trai shnong bad kiwei ki sakhi satar ba ka khyrdop ba don mynta ha ka thaiñ ka dei ka bym lah ban tehlakam shuh namar ka jingbun palat ki mynder ri kiba ïaid lyngba. Kumta ka jingbym buh ïa ka khyrdop ha Tongseng kan nang plie lynti ïa ka jingwan rung ki mynder ka bym lah ban pyrkhat shuh shapoh ka district.
