Shillong, Nailur 18
Ki dkhot ka Ïingdorbar Thawaiñ ka Jylla lane MLA kiba la shakri kham duna ïa ka 2 snem 6 bnai ruh kin sa ïoh beit ïa ka baibam (pension).
Kane ka long katkum ka aiñ-rew kaba tip kum “The Legislative Assembly of (Members’ Pension) (Amendment) Bill, 2023”.
Kane ka aiñ rew la wanrah ha Ïingdorbar Thawaiñ ha kane ka Dorbar Synrai kaba la sdang ha ka 15 tarik mynta u Nailur, bad la wanrah ban pynkylla ïa ka aiñ kaba la don lypa, kata, “The Legislative Assembly of (Members’ Pension) Act 1977 (Meghalaya Act No.6 of 1977).”
Katkum ka bynta ba la buh ban pynkylla ïa ki kyndon ha kane ka aiñ, la ong ba ka por ïa ki MLA ban ïoh baibam ka long ban shakri 2 snem 6 bnai katkum ka Section 3 jong ka aiñ kaba la don, bad kito kiba ïoh ban long MLA kham duna ïa kane kin nym ïoh ïa ka baibam.
Kumta la ong ba namarba ki don ki MLA kiba duna ka jinglong MLA ïa ka 2 snem 6 bnai, la wanrah ïa kane ka jingpynkylla hapoh ka aiñ kaba la don lypa khnang ba kito kiba duna ïa katei ka por, kin ïoh ïa ka baibam bad kane kan treikam naduh ba sdang (retrospective effect), ym nangne shakhmat.
