Khliehriat, Nailur:
Ka jingïalang paidbah kaba la khot da ka Voice of the People’s Party (VPP) Khliehriat Circle ha ka 18 tarik Nailur ka la rai ban ïatreilang bad ai ka jingkyrshan kaba pura ïa ka jingïakhih jong ka Khasi Students’ Union (KSU) ban dawa maramot ïa ka National Highway 6.
U President ka VPP Khliehriat, Bah Damewanhi L Rymbai u la ong, kane ka jingïalang paidbah da kawei ka sur ka la rai ban ïatreilang bad ai ka jingkyrshan kaba pura ïa ka KSU kaba la pynbna ban ïakhih paidbah pyrshah ïa ka NHAI kaba la leh mutlop ban maramot ïa ka surok bah NH-6.
Ha kane ka jingïalang paidbah kaba long ha madan Teilang ha Dkhiah West la wan ban ïashimbynta da ki nongïalam bad dkhot ka HANM, HITO, East Jaiñtia Local Taxi Driver Association, East Jaiñtia Hills Driver Association.
Kum ban shu pynkynmaw ba ka KSU ka la dep pynbna ba kan pynlong ïa ka jingïakhih naduh 25 tarik Nailur da kaba thiah ha surok ha Khliehriat. Kane jingïakhih kan neh shitaïew lynter.
