Shillong, Nailur 19
U Myntri Rangbah ka Jylla, u Conrad K. Sangma u la ong ba ka jingkynnoh u nongïalam ka TMC, Dr. Mukul Sangma ka long kaba kamkai tam ban pynshisha ïa kano-kano ka jingkynnoh.
“Ka long kaba sngewsih ba u briew ha ka kyrdan jong u, u la wanrah ïa ka dur bad u la poi sha ka rai. Ka jingïadei jong ki briew na ka dur jong 2 ngut ki briew kiba shah shon dur lang, nga sngew ba ha ka pyrthei ba mynta, ka long kaba kamkai tam ban pynshisha ïa kano-kano ka jingkynnoh. Kumta ngam don eiei ban ong halor kane,” la ong u Sangma haba kren sha ki lad pathai khubor halor ka jingkynnoh u Dr. Mukul Sangma.
Katkum ka jingïathuh u Conrad, u shon dur bad ‘million’ ngut ki briew naba u dei u ’riew paidbah.
“Nga ïakynduh, bad nga shong bad nga shon dur bad ‘million’ ngut ki briew. Wat haba ïaid lynti ha surok, kin don kiba pynsangeh ïa nga, ngam ju ong em naba ngi dei ki ’riew paidbah,” u la ong.
“Nga sngew ba ban pynïadei ïa ka kam jong 2 ngut ki briew bad ban poi sha ka rai tang halor ka dur, nga sngew ba ka dei ka jingshim rai ka bym don nongrim da lei-lei ruh,” la ong u Sangma.
U la bynrap, “Ka dei ban dei halor ki sabut bad jingpynshisha halor ki kam aïu kiba la jia. Nga don jingtip eiei kaba nyngkong, kiei kita ki kam bad nga ithuh bun ngut ki briew bad ’riew shimet bad kum ki ’riew paidbah ngi donkam ban kren ïa baroh.”
“Te kumta hato ka mukotduma ïingbishar ne mukotduma pulit kaba la ujor, hato kata ka don ïa ka kyrteng jong u Conrad Sangma ha ka? Nga sngew ba kane ka dei ka jingkylli. Lane hato la khot ïa ngi na bynta kano-kano ka jingïakren halor kane ne la ujor ïa kano-kano ka mukotduma pyrshah ïa ngi, nga sngew ba kane ka dei ka nongrim halor kaei ka jingkren kaba ha kum kane ka kyrdan da u briew uba ha ka kyrdan ka dei ban long,” u la ong.
Haba kylli, u Myntri Rangbah u la ong ba un sa leh eiei halor kane katkum ki kyndon bad rukom hapoh ka ïingdorbar.
“Kumba nga la ong, ngam don eiei ban ong na ka liang jong nga haba kam don nongrim halor kiba kum kine ki jingkren kiba la kren,” u la ong.
