Nongstoiñ, Nailur 19
Ha kaba ïadei bad ka jingjia kaba sngewsih ha kaba kawei ka longkmie ba dang armet ka la duh noh ïa la i khunlung ha kawei ka kali kamai namar ka jingdheng kali kaba jur kaba la mih na ka jingdon jong ka jingïakop khwai dohkha ha Pamphyrnai ha ka 16 tarik u Nailur 2023. Kumta ki bor District ka West Khasi Hills ha ka Sngi Ba-ar ki la shong jingïalang ha kaba la pyntip ba la thung da ka ‘magisterial inquiry’ ban tohkit bad na ka liang ka tnat pulit kan shim da ka ‘Sou Moto case’ halor katei ka jingjia.
Ïa kane la pyntip da u Deputy Commissioner (DC) ka West Khasi Hills u Bah Garod LSN Dykes, IAS haba kren sha ki lad pathai khubor ha ka jingïakynduh ha shlem treikam jong u.
U DC ka West Khasi Hills u la ong ruh ba ha kane ka jingïalang, ki la ïoh pdiang ruh ka jingpyntip na ka tnat District Council Affairs (DCA) jong ka Sorkar Jylla, ba la pyndam noh ïa ka ‘notification’ ne byrta jong ka KHADC kaba la ai jingbit na ka bynta ka jingïakop khwai. Kumta hadien ba ka DCA ka la pyndam noh ïa ka byrta jong ka KHADC, ki bor District ka West Khasi Hills ruh ki la shim ïa kajuh ka bynta ban pyndam noh ïa baroh ki jingai jingbit ïa kaba ka KHADC ka la dep ban ai bad kane kan treikam mardor haduh ban da pynbna da kumwei pat.
U DC u la ong ruh ba kaba ar halor ka jingjia ha Pamphyrnai, kaba hap hapoh ka shnong Ksehkohlong la dep ban thung da ka ‘magisterial inquiry’ bad na ka liang u Superintendent of Police un ujor da ka Sou Moto pyrshah ïa kato ka jingjia.
U DC u la ïathuh ruh ba ha kaba ïadei bad katei ka jingjia, na ka liang ki nongpynïaid khwai, ki nongïalam shnong ka Ksehkohlong ruh ki la wan mih, ha kaba na ka liang u DC u la ong ïa ki, ba ïa kaei kaba la jia, ka aiñ kan ïaid bad kan shim ïa la ka jong ka lynti.
Ha kawei pat ka khubor u Bah Garod LSN Dykes, u la pynbna paidbah ba ka katkum ka Notification No.DCA.33/2012/520, Dt. 19.09.2023 kaba la ïoh pdiang na u Secretary ka Sorkar, Meghalaya, Shillong, ba la ‘Pynduh’ ïa baroh ki jingbit kiba la ai da ka Khasi Hills Autonomous District Council, Shillong ha kaba ïadei bad ki jingpynlong ïa kino kino ki jingïakop khwai dohkha hapoh West Khasi Hills District.
Shuh shuh u la ong ruh ba lada lap ïa kiba ïaleh pyrshah halor kane ka hukum, la ki dei ki riewshimet ne ki kynhun kin sa shah pynshitom katkum ki kyndon jong ka aiñ.
