Nongstoiñ, Nailur :
Ka Federation of Khasi Jaiñtia & Garo People (FKJGP) West Khasi Hills ka la dawa na ki bor distrik ka West Khasi Hills ba haba ki ai jingbit ïa ki jingpynlong ïakob khwai doh, ki dei ban ai ka jingbit ym tang ba kin peit ïa ka jingbit jingbiang jong ka jingpynlong ïakob khwai hynrei ban peit ruh ïa ka jingbit jingbiang jong u paidbah uba ïaid ba ïeng ba kan nym don ka jingktah ïa kiwei bad ka kam kaba leh kiwei kam dei ban ktah ïa ka ïaid ka ïeng jong kiwei.
Ïa kane la ong da u General Secretary ka FKJGP WKHD u Bah Wilis Syiem haba kren ha ki lad pathai khubor ha kaba u la ong ruh ba ka FKJGP ka dawa ba ki bor distrik, ki dei ban peit ruh ïa ki jaka ïeng kali kiba biang, ki jaka buh kali na ka bynta ki nongleit ha ki jaka khwai bad lada kam biang ka jaka nangne shakhmat ym dei shu ban ai ka jingbit bad ki nongpynlong ki dei ban peit ba kam dei ban ktah ïa u paidbah uba ïaid ba ïeng.
Nalor kata, u Bah Syiem u la ong ruh ba na ka liang ka FKJGP ka da sngewkhia shisha halor ka jingkhlad noh i khyllung iba la kha ha shiteng lynti tang na ka daw jong ka jingdheng kali na ka jingdon ka jingïakob khwai dohkha ha Pamphyrnai myn ha ka 16 tarik u Nailur.
Shuh shuh u la ong ruh ba bunsien haba don kiba kum kitei ki jingïakob khwai dohkha ha ki pung harud surok, ka jingdheng kali ka don beit kaba la pynthut ïa ka ïaid ka ïeng jong ki paidbah khamtam ïa kiba pang ba shitom. Namar kata, u la ong ba ki bor distrik haba ki ai jingbit ki dei ban pyntikna ba ka bit ka biang kam dei ban don tang hapoh ka jaka khwai hynrei shabar ïa ki paidbah ba ïaid ba ïeng ruh kumjuh.
