Shillong, Nailur 19
Ka East Khasi Hills ka dei kawei na ki district ba jur eh ki kam sniew kam runar, ha kaba tang ha ki 3 snem, kata hapdeng u snem 2020 haduh 2023 la dep ban pynrung kyrteng haduh 5196 ki sniew kam runar.
Ïa kane la pyntip da u Symbud Myntri Rangbah ka jylla uba khmih ïa ka tnat Kam Pohïing u Bah Prestone Tynsong haba jubab ïa ka jingkylli ba la wanrah da u MLA ka UDP na Nongpoh u Bah Mayralborn Syiem hapoh ka ïingdorbar ha ka Sngi Ba-ar.
Haba buh jingkylli ha ki kynta kylli jingkylli hapoh ïingdorbar, u Bah Mayralborn Syiem haba pynpaw ïa ka jingsngewkhia u la ong ba ka jingbishar pyndep ïa ki case bad ki kam thombor pyrshah ïa ki kynthei khynnah ka long kaba duna bha.
Haba wanrah ïa kane ka mat ha ki kynta kylli jingkylli, une u MLA ka Nongpoh u la ong ba ki la don haduh kumba 2821 tylli ki kam sniew kam runar tang ha kine ki 3 snem shiteng eiei ha kaba tang 84 tylli la lah ban pyndep ïa ka jingbishar.
U MLA ka Nongpoh u la pan ruh ka jingpynthikna na u Symbud Myntri Rangbah halor ka jingdonkam ban pynkloi ïa ka jingtohkit bad ban pynngat ne chargesheet ïa ki briew kiba donkti ha ki jingjia ne ki case kiba dang sahteng khnang ban pynkloi ïa ka jingbishar kaba hok.
Haba jubab ïa kane u Bah Prestone u la pdiang ba ka long kaba i duh mynsiem namar ka jingshim por na ka bynta ban tian bishar bad pynngat ïa ki nongleh kam bymman. Wat la katta u la ong ba ki bor pulit ka jylla ki la shim ïa baroh ki sienjam ban pyndep ha kaba ïadei bad ka jingpynngat bad ban phah ïa kane shapoh ka ïingbishar ban pyndep ïa ka jingtian bishar.
“Nga kwah ban pynthikna ba ki pulit bad ka sorkar kin ym shong kli-kti halor kane ka phang. Ngin shimkhia halor kane ka bynta bad pynthikna halor ki sienjam hapoh ki ïingbishar ban pynkloi ïa ka jingshim bishar,” ong u Bah Prestone.
Ha kajuh ka por u la pyntip ruh ba ka sorkar jylla dang shen ka la thaw la ka jong ka Directorate of Forensic hapoh ka jingkhmih jong ka tnat Kam Pohïing da ka jingthmu ban pynkloi ha kaba ïadei bad ki jingtreikam kiba ïadei bad kane ka bynta.
U la ong ruh ba ki don katto katne ki jingtyrwa ba la phah na ka bynta ban pynkhlaiñ ïa ka jingtreikam jong kane ka tnat bad na ka liang ka sorkar ruh ka la dep ban ai ka jingmynjur halor kane ka jingtyrwa. U la ban ruh ba ki la dep ban ïoh pdiang ïa ki katto katne ki kor ki bor ba donkam khnang ban pynthikna ban pynkloi ïa ka case kiba dang sahteng bad ruh ba kin ym donkam shuh ban phah shabar ka jylla na ka bynta ka jingleh ïa ki test khnang ban pynlong ïa ka jingtohkit.
Ha kaba ïadei bad ka jingduna nongtrei hapoh ka tnat pulit, u Bah Prestone u la pyntip ba dang shen ki la pynlong ïa ka jingïalang hapoh ka jingïalam jong u Myntri Rangbah ka jylla u Conrad K Sangma ha kaba ki la shim ïa ka rai ban pyndap ïa ki jingduna pulit naduh ki ophis treikam jong u SP, ki thanat kynthup jong ki kynthei bad ki police outpost ha baroh ki bynta jong ka jylla.
“U DGP u dang pynkhreh ïa ka thup jingdonkam briew bad hadien ba la dep kane, ka Sorkar kan sa thaw bad mang ïa ki kam. Nga la thikna ba khyndiat bnai nangne, ngin sa lah ban pyndap ïa kine ki jingdonkam baroh,” u la pyntip.
