Shillong, Nailur 19
Ha ka step Sngi Ba-ar kawei ka jingjia ka la pynkyndit bad pynpar ñiangkhriat ïa ki briew hadien ka jinglap ïa ka metïap jong iwei i khyllung napoh ka kali kit ñiut jong ka shnong Mawpat.
Ïa kane ka metïap la lap da ki nongwan lum ñiut bad ki nongñiah kali kit ñiut ha ka por ba ki la ïaid kylleng ka shnong Mawpat ban leit lum ïa ki ñiut ba la wanrah da ki nongshong shnong ban bret. La ong ba kitei ki nonglum katba ki dang krad ïa ki ñiut, ki la kyndit thret kumba ïoh ïuh tdong bseiñ hadien ba ki la lap ïa kawei ka metïap khunlung ba dang shu kha hapoh ka kali.
Mar kumta kine ki nonglum ñiut ha ryngkat bad ki ’riew paidbah ki la pyntip noh wut-wut sha ki pulit halor kane ka jingjia. Kumta na liang ki pulit ruh mar-mar ki la wan ban shimti noh ïa kane ka metïap ban leh ïa kaba donkam.
Ïa kane ka metïap ki pulit ki la pynkit noh sha North Eastern Indira Gandhi Regional Institute of Health and Medical Sciences (NEIGRIHMS) ban leh ïa ki test.
Ha kaba ïadei bad kane, u Rangbah Shnong ka Mawpat Pyllun u la ong ba kum ka Dorbar Shnong ka la kyndit mar shu ïoh jingtip halor kane ka khubor ba lap ïa ka met jong i khunlung napoh ka kali kit ñiut bad kumta ka Dorbar Shnong hynne ka sngi ka la khot jingïalang kyrkieh ïa ki nongïalam shnong.
Shuh shuh u la ïathuh ruh ba ka bor shnong kan tohkit hi dalade bad kan khot ïa baroh ki longïing kiba ka kali kit ñiut ka la dep ban lum ñiut ha ka ban tohkit bniah ïa ki ban lap ïa ki briew ba leit bret ïa itei i khunlung hapoh ka kali kit ñiut.
