Shillong, Nailur 19
Ki dkhot jong ka seng Hynñiewtrep National Youth Front (HNYF) East Khasi Hills District ha ka step jong ka 19 tarik u Nailur, 2023 ki la lap ïa kawei ka dur blei thaw ha kawei ka jaka kyndong katba ki dang thmu ban leit ïakynduh ïa u Commissioner of Tax ha ka kamra treikam kaba don markhap bad ka ophis jong u District Transfer Officer (DTO) ka East Khasi Hills District ha Lachumiere Shillong ha ka mala kaba shajrong duh kaba dei ka bynta kaba dang shna bad ba la thmu ban pynkha kamra.
Haba ïoh ban ïakren bad u Bah Steve Raymond Khyriem uba dei u General Secretary jong ka HNYF ha ryngkat ka jingïadonlang ki dkhot, u la pynpaw ba u dap da ka jingsngewlyngngoh ba kumno kitei ki bar jylla kiba shu wan ban bylla ban pyntrei bad shna ïa katei ka ïing jong ka ophis DTO hynrei ki ïoh lad pynbna ban shna bad buh ïa katei ka dur bleithaw jong ki hapoh katei ka jaka.
“Katba ngi dang ïaid lynti, ngi ïohi ïa katei ka dur bleithaw kaba ki buh hangtei bad kane ka pynlyngngoh ïa ngi ba ha kano ka rukom ki lah ban buh ïa kine ki dur blei thaw ban mane hangne hapoh ophis”, la ong u Bah Khyriem.
U Bah Khyriem u la ong ba um pat ju ïohi ba sha kiwei kiwei ki ophis treikam kin leh kumne bad kane ka pyni ba u bar jylla u la ïohlad bha ban leh katba mon hangne. Kumta kum ka seng ka kwah ïoh jingtip na ka liang katei ka ophis treikam kaba dei khmih ïa katei ka bynta ba ha kano ka rukom ki ïoh jingbit ban buh blei thaw hapoh katei ka ophis namar ka long kaei kaei ka bym sngewtynnad.
“Ki ïoh bor naei kine ki nongtrei ban pynlong jaka mane blei namar kane ka dei ka ophis sorkar bad kam dei ka jaka mane blei bad wat da ngi ki Khasi ruh tharai ngim lah ban pynlong jingïaseng hangne bad kane ka pynlyngngoh ïa ngi kum ka seng”, la ong kitei ki nongïalam seng.
U la ong ba ka jaka mane blei jong ki ka don bad kumta ki dei ban leit mane sha ki jaka ba ki dei ban leit ym ba kin mane hapoh ki ophis treikam bad lada ki dei ki nongtrei hapoh katei ka ophis ruh kam ïahap satia ba kin ïoh buh blei thaw katba ki mon.
U la ong ba ka seng kan hap ban pynsngew ïa kane sha ki bor kiba halor khnang ba ki ophis treikam jong ka sorkar kim dei satia ban kylla long ki jaka mane jong kino kino ki jait ñiam bad ka seng ruh kan sa wad jingtip ruh ïa kiba leh tam bad kiba aibor ïa kitei ki bar jylla ban buh ïa katei ka dur blei thaw.
“Ïoh lashai ka kylla long ka jaka mane blei thaw ba shapoh kan dei ka jaka treikam sorkar bad shajrong pat kan dei da ka jaka mane blei thaw, ngim lah ban pdiang ïa kane namar ïoh ba hadien habud ngim lah leh eiei shuh ban weng ïa katei ka dur blei thaw na kane ka jaka”, la ong kitei ki nongïalam seng.
