Shillong, Nailur 19
Ki la don palat 9000 tylli ki masi kiba la shah ktah na ka jingpang Lumpy Skin Disease (LSD) ne jingpang snieh doh ha Jylla. Ha kaba ïadei bad kane, na ka liang jong ka Sorkar Jylla ka la kular ban siew ïa ka bai lutksan sha ki nongri masi.
Ïa kane ka jingkular ban siew bai lutksan, la pyntip da u Myntri ka tnat Animal Husbandry and Veterinary u Bah A.L Hek haba jubab ïa ki jingkylli ba la wanrah da u MLA ka VPP na Nongkrem hapoh ka ïingdorbar ha ka Sngi Ba-ar. Ha kajuh ka por u la pyntip ba haduh mynta ka Sorkar kam pat ai satia ïa kano kano ka song pisa ban ïarap ïa ki nongri masi namar ka jingwan lynshop ka jingpang LSD.
Kane ka jingkular ka la long ruh hadien ba u Bah Ardent M Basaïawmoit u la pan jingtip la ka Sorkar ka don jingthmu ban ai bai lutksan sha ki nongri masi, kiba hap ban khang khyrdep ïa ki farm namar katei ka jingpang, u Bah Hek u la ong, “Ka Sorkar kan sa siew ïa ka bai lutksan (sha ki nongri masi)”.
U Bah Hek u la pyntip ruh ba 4 tylli ki hospital Veterinary bad 125 tylli ki Dispensary ki la ai dawai ban injek ïa ki masi ban ïakhun ïa kane ka jingpang.
Ha kawei pat ka liang, u Myntri u pyntip ba ka Sorkar ka la ai bai lutksan ba kot T.16,20,000 sha ki paid nongri jingri ha u snem 2020-2021 namar ka jingïap jong ki 540 tylli ki sniang na ka jingpang African Swine Fever.
Haba u Bah Ardent u la kynnoh ba ka jingpang swine flu ka la wan jia hadien ba ka Sorkar ka la sdang sam ïa ki ’niang khun kiba wanrah na shabar ka Jylla, u Bah Hek u la ong, “Ngim pat dei ka Jylla kaba lah ban pynmih hi ïa ki ’niang khun, kumta ngi hap ban shaniah na shabar ka Jylla”.
