Jowai, Nailur:
Ka Balang Unitarian Jowai ka la rakhe pyndonburom ïa ka lyngkhuh snem ba 136 snem ka jingwan ka Balang Unitarian ha rilum Khasi-Jaiñtia halor ka phang “To ïalap, to pyrta ïa ka Niam U Blei, ba jingbha kan synshar halor ka pyrthei”.
Ïa kane ka sngi kyrpang la rakhe ha ïingmane ka Balang Unitarian Jowai ha ka jingwan sakhi shitrhem da ki hajar ngut ki riewngeit jong ka Balang Unitarian mynta ka Lah Sngi U Blei.
La sdang ïa ka jingrakhe lyngkhuh snem naduh ka por 8.30 mynstep da kaba pyndeng syntiew ïa u mot u Nongseng Rangbah ka Balang u Hajom Kissor Singh da u Moderator Chibordon S Shylla bad pynher ruh ïa ka lama.
Ha ka nohphai sngi, ka la don ka jingïaseng paidbah ba la pynïaid da u Moderator Kiki Pakma uba la thang ruh ïa ka sharak katba ïa ka khubor lyngkhuh snem la sam da u Rev. Sowat Laloo.
U Rev. Sowat haba sam ïa ka khubor lyngkhuh snem, u la ong kane ka dei ka sngi kaba kyntang jong ki riewngeit ka Balang Unitarian namar dei ha kum kane ka por ba la kynmaw ieid, kynmaw burom ïa u Babu Hajom Kissor Singh bad ki nongbud jong u kiba la seng nyngkong eh ïa ka niam Unitarian ha ka shnong Jowai ha ka 18 tarik Nailur, 1887.
U la ong ruh dei ha kum kane ka por ba la ai jingkheiñ sha U Blei, haduh katno ngi lah ban shakri ïa la ka jong ka niam bad haduh katno ngi lah ban ai ka jingshakri ïa ki para bangeit, ka ïing ka sem bad ïa ka imlang sahlang.
U la ong ruh ka Balang Unitarian ka hikai ban ngeit tang ha uwei U Blei. Kum ki riewngeit u la kyntu ban bat ïa ka soskular jong ka balang kata ban pynskhem ïa ka jingngeit bad ban long kiba kylluid ka mynsiem bad ban shakri ïa ki para briew bad ban synñiang sha ka balang bad ka imlang ka sahlang ban roi bad par.
Ha ka por janmiet ka la don ka jingïaid proseshon ha kylleng ki dong ka sor Jowai da kaba rah ïa ki dongmusa kum ka dak ban pyni sha ka pyrthei ïa ka jingshai mynsiem ba ka Balang ka la ïoh pateng na ka jinghikai Niam Unitarian.
