Tura, Nailur:
Ki nongtrei ka Garo Hills Autonomous District Council (GHADC) ha ka Lah Sngi U Blei ki la pynsangeh shuwa ïa ka jingïakhih ba khlem buh por jong ki hadien ba u CEM, u Albinush Marak u la ai ka jingkular ban pyllait ïa ka tulop ba 2 bnai jong ki haba kut jong une u taïew.
Kumba ka long, ka jingeh haba ïadei bad ka tulop, kaba la tam ïa ka 10 snem (bad kaba dang ïaid), mynta ka la ïaid sha u bnai ba 31 na bynta ki nongtrei. Katkum ka jingïathuh ki nongtrei, ka sien ba khatduh ba ki la ïoh jingsiew ka dei ha u bnai Jylliew mynta u snem bad katta ruh, ka tulop ba shi bnai ha ryngkat ka jingkular ban shen yn sa pyllait biang.
Ki nongtrei hapoh ka shatri jong ka Non Gazetted Employees Association (NGEA), ki la ïai bteng ïa kane ka jingïakhun.
Ka jingïalang jong ki nongtrei ka la long hynne mynsngi hajan ka ophis GHADC, Tura. Hashuwa, ki la byrngem ban ïaid shakhmat bad ka jingïakhih ba khlem buh por lada ka tulop jong ki ka dang sahkut.
Hynrei ha katei ka jingïalang, u CEM, Albinush u la ïashim bynta bad pan por ban pyllait ïa ka tulop ba 2 bnai haba kut jong une u taïew.
“Hadien ka jingkular jong u, ngi la rai ban ap haduh kaba kut taïew na bynta ban pyllait ïa ka tulop jong ngi. Lada ym lah ban pynbeit ïa kane, ngin sdang ïa ka jingïakhih ba khlem buh por naduh ka Lah Sngi U Blei jong ka taïew ban wan. Ngin ap bad peit la ki bat ne em la ka kular bad siew sha ngi ïa kaei kaba ki la kular,” la ong u President ka NGEA, u Brithen Sangma.
