Shillong, Nailur 20
U MLA ka Liang Pyrshah na Nongkrem, Bah Ardent M Basaïawmoit u la buh jingkylli ba aïu ka Sorkar Jylla ka la leh halor ka jingkren ai ding bad maham jong ki nongïalam ka Karbi Student’s Association (KSA) ba kan jia kumba jia ha Manipur lada ki duh ïa ka jaka.
U Bah Ardent uba dei ruh u President ka Voice of the People Party (VPP) u la buh kane ka jingkylli lyngba ka mat ïatai ha ka ‘Zero Hour’ kaba u la wanrah ha ka sngi Balang hapoh ka ïingdorbar.
U Bah Ardent M u la ong, hato ka Sorkar ka la leh aïu hadien ba la ïohi ïa ka jingkynthoh bad hato ka la ïakren ne em bad ki bor Sorkar na Assam ban pynthikna ba ka shongsuk ka shongsaiñ kan neh ha khappud.
Shuh shuh une u MLA ka Nongkrem u la ong ba kane ka rukom kren jong ki nongïalam ka KSA ka long kumba ai ding ban ïakynad bad bynrap ba kane ka jingkren ka lah ban wanrah ka jingshah ktah ha ka suk ka saiñ ha khappud ka Assam bad Meghalaya, ha kaba u la kdew ruh ïa ki kyndon aiñ kiba lah ban shah pynshitom haba pynmih ïa ki jingkren pynshit.
Haba jubab, na ka liang u Myntri Rangbah ka Jylla u Conrad K Sangma u la ong ba ïa kane ka jingkren jong ka KSA wat u Myntri jong ka Sorkar Assam uba dei ruh u Chairman ka Regional Committee, u Pijush Hazarika um ïahap satia.
U Conrad u la ong ba ïa mynta la pynjur ka jingpeitngor ha ka thaiñ khappud kaba don ha Khanduli, bad la pynkhlaiñ ïa ka jingïaid pahara ha ka thaiñ ban ïada na kano-kano ka jingjia pynkheiñ aiñ kaba ktah ïa ka shong suk shongsaiñ.
U la ong ba ha ka jingwan jong u Myntri Rangbah ka Assam bad u CEM ka Karbi Anglong Autonomous Council sha Shillong dang shen, la ïasyllok halor kane ka phang ka ban rah pat ha ka jingïakren pynbeit pud ka ban long ha u Risaw ban wan ban shim ïa ka rai kumno ban ïaid shakhmat, bad hadien kata yn leit ruh ban ïakynduh ïa ki paidbah ha ka thaiñ khappud.
