Shillong, Nailur 20
U nongïalam ka Liang Pyrshah ha Ïingdorbar Thawaiñ, u Bah Ronnie V Lyngdoh u la dawa na ka Sorkar Jylla ban thoh sha ka Sorkar Pdeng ban kyntiew ïa ka North Eastern Indira Gandhi Regional Institute of Health and Medical Sciences (NEIGRIHMS) bad ruh ban thawlad ban ïoh ïa ka jaka sumar kumba long ka All India Medical Institute of Medical Sciences (AIIMS) khnang ba ki lad jingsumar kin kham biang bad kin long ka jingmyntoi ïa ki paidbah ka Jylla.
U Bah Ronnie uba dei u MLA ka Congress na Mylliem konstitwensi u la wanrah ïa kane ha ka kynta kylli jingkylli ha Ïingdorbar Thawaiñ ha ka sngi balai jong ka dorbar synrai ha ka sngi Balang.
Haba wanrah ïa ka jingkylli, u Bah Ronnie u la pynsngew ïa shibun ki jingduna ha ki lad jingsumar katkum ka jingïaid jong ka por mynta ha NEIGRIHMS khamtam ban ïaryngkat kum ka AIIMS kaba don ha kiwei pat ki jaka.
Kumta u la kylli, la ka Sorkar Jylla ka la ïakren ei ei bad ka Sorkar Pdeng ban kyntiew shuh shuh ïa ka NEIGRIHMS kumba long ka AIIMS namarba ki don shibun ki jingeh ban ïoh leit sumar sha AIIMS kaba don ha Guwahati, Assam.
U Bah Ronnie u la ong ba ka jingbym don ka jaka sumar kaba kham biang ka pynlong ruh wat ïa ki doktor ba kin mih noh nangne bad mynta lei lei ba la don ka AIIMS ha Guwahati bad kane kan nang buh jingeh ïa ki paidbah baduk bajynjar ban ïoh ïa ki lad jingsumar shawei pat.
Haba jubab ïa ka jingkylli, ka Myntri ka koit ka khiah ka Kong Ampareen Lyngdoh ka la kubur ba ka jingdon ka jaka sumar kum ka AIIMS ka pynktik jingmut ruh ïa ki nongpang ban leit sha ka jaka sumar.
Ka Kong Ampareen ka la ong ba ka NEIGRIHMS, kum ka jaka sumar kaba long la kajong bad laitluid kaba la seng da ka Sorkar Pdeng katkum ka aiñ jong ka Parliament ha u snem 1987 ka la don ha ka lynti mynta ban nang pynïar ïa ka jingshakri kaba kham bha ha ryngkat ki jingthmu ban pynbha shuh shuh ïa ki tnat jingsumar kum ka radiology bad oncology.
Kane ka Myntri ka la pyntip ha Ïingdorbar ba ka don ruh ka jingïakren bad u Myntri Rangbah ka Jylla u Conrad K Sangma na ka bynta ban pynkhreh ïa ka jingthoh kaba long ka jingtyrwa ka ban sa phah sha ka tnat ka koit ka khiah ka Sorkar Pdeng na ka bynta ban tei ïa ka jaka sumar ha Meghalaya kaba long kum ka AIIMS.
Na ka liang u Bah Ronnie u la pynpaw biang halor ka jingdonkam ban don ka jaka sumar kaba biang ki tiar ki tar khamtam kum ka AIIMS kaba ym dei tang ka kyrteng, hynrei ka don ki lad jingsumar ban myntoi ki paidbah.
U la ong ba lada ka Sorkar ka thoh sha ka Sorkar Pdeng ban kyntiew shuh shuh ïa ka NEIGRIHMS ki doktor ruh kin neh bad ym da donkam eh ban pynlut bun na ka liang ka Sorkar Pdeng ha ka liang ka pisa tyngka namar ka dei ka jaka sumar kaba la don lypa.
Une u MLA ka Congress na Mylliem u la ong ba ki jaka sumar ha Meghalaya ki duna ha bun ki liang kumba ka long mynta kum ka endocrinology, nephrology kaba don bad ka dialysis unit, gastrology-enterology, plastic surgery, burns units, bad nuclear sciences.
Kumta u la banjur ban don ki lad jingsumar kiba biang kiba dei jong ka Sorkar namar kane kan ïarap shikatdei eh ban pynduna ïa ka jinglut jingsep jong ïa ki longïing kiba duna ka ïoh ka kot bad ki nongshong shnong ka Jylla.
