Shillong, Nailur 20
U MLA ka United Democratic Party (UDP) na Mookaïaw konstitwensi, u Bah Nujorki Sungoh u la dawa na ka Sorkar ban pynduh noh ïa ka ‘personal interview’ haba thung ïa ki kam Grade-IV khnang ban lait na ka jingjied kaba shu noh shiliang, hynrei na ka liang u Myntri Rangbah u Conrad K Sangma u la ong ba ïa kane donkam ban khmih bha khnang ban wanrah da ka policy kaba biang lang ïa ki nongwad kam.
U Bah Nujorki u la wanrah ïa kane lyngba ka kynta kylli jingkylli ha Ïingdorbar Thawaiñ ha ka sngi Balang.
U la ong ba donkam ban pynduh noh ïa ka personal interview khnang ban lait na ki jingtharai sniew ba kiba shahjied ki dei kiba la leh lyngba ka jingmon lypa (nepotism), bad u la kdew ruh ïa ka rai jong ka Sorkar Pdeng ban pynduh ïa ka personal interview naduh u snem 2016 ha kaba la bud lang ruh da ki 23 tylli ki Jylla bad 8 tylli ki Union Territory ban khanglad ïa ka rukom jied lyngba ka jingmon lypa ïa kiba dei ban ïoh kam.
Na ka liang u Myntri Rangbah u Conrad K Sangma u la ong ba ka Sorkar Jylla ha u snem 2017 ka la thoh sha ka Sorkar Pdeng ba kan pynneh beit ïa ka personal interview.
U la ïathuh ruh ba ki mark ki long 50 haba thoh eksamin bad 50 ha ka personal interview ban rung kam Grade-IV.
U Bah Nujorki u la ai nuksa ruh ïa kawei ka jingthungkam Grade-IV ha kaba la pynlong ïa ka personal interview, bad kaba lyngngoh ka long ba uba pyndep ïa tang ka Matrik u ïoh ïa ka kam, katba uba pyndep ïa ka Degree u duh.
U Conrad u la ong ba ka personal interview ka dei kaei kaei kaba ïarap ruh ban tip shuh shuh ïa ka jinglah bad jingtbit jong ki nongwad kam nalor ka eksamin.
Kumta u la ong ba ïa kane ka bynta hap ban khmih bha biang namarba ki don ki jnit ki jnat kiba ïadei bad kane ha kaba ka jingthmu ka long ban shim ïa ka rai kaba bha tam ïa ki samla bad ban ïaid beit ka rukom thungkam kaba long ïaryngkat lang.
Ha kawei pat ka liang, ka Khun Hynñiewtrep National Awakening Movement (KHNAM) kaba la ju dawa ban pynduh ïa ka personal interview haba thungkam Grade-IV, ka la ai ka jingïaroh bad pynpaw ka jingsngewnguh ïa u MLA, Bah Nujorki Sungoh uba la rah ïa ka mat ban pynduh noh ïa ka Personal Interview ha ki kam sorkar Grade IV.
“Ka seng naduh ki snem ba la dep ka la dep ban ai jingthoh kiba shai bad kiba shong aiñ sha u CM ban dawa pynduh noh ïa ka personal interview na ki grade B,C bad D jong ki kam sorkar, bad ngi la pynshai ruh ba wat ka sorkar India bad ki 23 tylli ki jylla bad 8 tylli ki UT ha ka ri India ki dep ban pynduh ïa ka personal interview, hynrei haduh mynta ka sorkar ka sngap jar jar,” la ong u Working President ka KHNAM u Bah Thomas Passah ha u kyrwoh.
U la ong ba ka jubab jong u Myntri Rangbah kam pynhun ïa ka seng bad ka khlem pynhun ïa u MLA badonburom Bah Sungoh lane ïa kiwei kiwei ki nongmihkhmat jong ka Ïingdorbar Thawaiñ ka jylla.
Ka KHNAM ka ong ba ka jubab jong u Myntri Rangbah kaba u ai ba 50/50 % la bhah na ka bynta ka Written test bad ka personal interview, ka plie lad bha ïa ki briew ba don ha ka bor ban tuklar lane mushlia ïa ka ïoh kam ïoh jam hok jong ki samla.
U Myntri Rangbah u la ong ruh ba la pynlong ïa ka personal interview ban peit ruh ïa kiwei kiwei ki jingdonkam ha ki candidate, ka jingkylli kaba la dei ban kylli ïa u MR ha ïing Dorbar ka long “kiei kita ki jingdonkam kiba hap ban peit tang lyngba ka personal interview haba thungkam Sweeper lane kiwei kiwei ki kam grade 4?. Ka jingshisha ka long ba ïa ka personal interview donkam tang ha ki jait kam kiba donkam ban peit ïa ka personality jong u/ka kyrtong.
Halor ka jingong u Myntri Rangbah ba ka don ka jingduhnong bad jingïohnong lada ym don personal interview shuh, ka KHNAM ka la ong ba la dei ban kylli, kiei kita ki jingduhnong lada pynduh noh ïa ka personal interview, namar kumba ngi la thoh sha ka sorkar ngi la batai shai kdar ba lada pynduh ïa ka personal interview ka jingïohnong kan long ba ki badei hok ban ïoh kam kin ïoh, ka por bad pisa jong ka sorkar kin ym sepei, ki samla kiba thep kam kin ïoh jingkyrmen, ki briew ba mlien ban pan pisa ban pynïoh kam kin ym ïohlad shuh. Ka jingduhnong lada pynduh ïa ka personal interview ka long tang ïa ki badon ha ka bor namar kin ym ïohlad shuh ban leh shiliang lane leh ‘politics’ ïa ka hok ki samla.
Halor ka jingong u MR ba ka sorkar ka dang peit bniah ïa baroh ki bynta (process) jong ka rukom thungkam bad kan shimpor, u Bah Thomas u la ong, “kine baroh ki dei tang ki jubab ban pynjlan ïa kaei kaba la donkam ban leh noh. Ngi tip shai ba ki bynta kiba donkam ha ka jingthung kam sorkar ka don tang 4 tylli kita ki long, ban pyllait advertisement, ki samla kin pyndap form ban thep kam, ban pynlong ïa ki test bad ban jied napdeng kiba la shahjied. Ngi sngewthuh balei U MR u kwah ban pyni ba ka kam ka long kaba jrong bad ba khongwaiñ bha namar kam long satia kumta. Ka KHNAM ka kloi ban ïathir bad u MR halor kane ka mat bad lada u jop u MR ngim ym dawa shuh, hynrei lada ka ïeng ka nia jong ka seng, ka sorkar ka dei ban leh noh mardor ïa kane ka jingthmu babha.
“Ka seng kan sa shim ïa la ki jong ki lad ki lynti ban pyntikna ba ka sorkar kan pynduh noh ïa ka personal interview,” la bynrap une u nongïalam ka KHNAM.
