Shillong, Nailur 20
Tang hadien shi sngi ba la bret ïa i khyllung ba dang shu kha ha ka kali kit ñiut ka shnong Mawpat, ki pulit ki la kem noh ïa ar ngut ki briew ba kynthup ïa ka samla lud ryngkat bad u samla shynrang.
Ka jinglap bad ïoh kem noh jong ki pulit ïa kitei ki ar ngut, ka la wan hadien ba na ka liang ka shnong ka la shim khia bad pynlong ka jingtohkit tang mar ïa tip halor ka jinglap ïa i khyllung ba dang shu kha na ka kali kit ñiut hapoh ka shnong.
Lyngba ka jingshim khia jong ka shnong bad trei shitom ban wad ïa ki briew ba donkti, la ong ba ha ka step sngi Balang, kane ka samla lud kaba dang hapoh ka 18 snem ka rta, ka la wan mih shakhmat ban phla halor ka kam ba ka la leh.
La ong ka kmie jong itei i khunlung ka dei kaba dang don hapoh jong ka 18 snem ka rta bad ki shong bad sahwai ha kawei ka ïing ha Mawpat, katba u kpa jong itei i khunlung u dei na ka shnong Rymbai uba shu wan trei wan ktah ha Mawpat.
Hadien ka khubor jong ka jinglap ïa i khunlung ba dang shu kha ka la saphriang, ka kmie jong ine i khunlung da ka jingsngewsih bad jingsngewthuh ïa ka jingleh bakla lajong, ka la leit ban phla ha ki trai ïing, ha kaba ki la pyntip kylla sha ka Dorbar Shnong.
Ka Dorbar Shnong ryngkat bad u Rangbah Shnong, ki la aiti noh ïa kitei ar ngut sha ki pulit ba kin pynlong ïa ka jingtohkit.
