Shillong, Nailur 20
U MLA ka Congress na Mylliem uba dei ruh u nongïalam ka Liang Pyrshah, u Bah Ronnie V Lyngdoh u la buh jingkylli ïa ka Sorkar halor ka jingbym don ki de-addiction centre lane ki jaka ban pynkhuid ïa kiba kyrni ha u drok, bad na ka liang ka Sorkar ka la kular ban buh 5 tylli ki de-addiction centre ha kaba yn peit lang ruh na ka bynta ki kynthei.
U Bah Ronnie u la wanrah ïa kane ha ka kynta jingkylli ha ka sngi balai jong ka dorbar synrai ha ka sngi Balang ha Ïingdorbar Thawaiñ.
U Bah Ronnie u la ong ba ban pynbeit ne pynbha pat ïa kiba ngop ne kyrni ha u drok, donkam ban pynkhuid shwa na ka met jong ki bad hangta yn sa lah ban ïalam ïa ki sha ka jaka ka ban pynbeit biang ïa ki (rehabilitation centre).
Ka Myntri ka koit ka khiah ka Kong Ampareen Lyngdoh, haba ai jubab, ka la ïathuh ba ka Sorkar kan buh 5 tylli ki de-addiction centre ha Jylla baroh kawei.
Halor ka jingkylli u MLA ka Mawlai u Bah Brightstarwell Marbaniang, ka Kong Ampareen ka la ong ba ïa kine ki de-addiction centre yn bei hi da ka Sorkar, bad ka la ong ba ki don ruh ki jaka kiba la don lypa kiba pynïaid da ki kynhun shimet kum ka SANKER kiba yn kyrshan lyngba ka projek kaba tip kum ka Drug Reduction Elimination and Action Mission (DREAM) kaba peit ba khmih da ka tnat Social Welfare kaba ka thong ka long ban buh ïa ki de-addiction centre ha kylleng ka Jylla bad ka don ruh ka jingphaikhmat ban buh ïa ka De-addiction centre na ka bynta ki kynthei namar ym pat don tang kawei ruh haduh mynta.
Na ka liang u MLA ka Mawlai u la kyrpad ruh ban buh kawei ka de-addiction centre ha Mawlai namar ka dei kawei na ki jaka jong kiba kyrni ha u drok.
