Shillong, Nailur 20
U MLA ka Voice of the People Party (VPP), Bah Ardent M. Basa-ïawmoit ha ka Sngi Balang u la ong ba ki paidbah ki khmih lynti ba ka Meghalaya hadien ba la ïoh ïa ka Jylla lajong kan shah synshar ha ki Lyngdoh, Sangma, Marbaniang, Kharkongor bad kiwei-kiwei hynrei ka la shah synshar pynban ha ki Kumar.
Haba ai jingkren hapoh ïingdorbar thawaiñ lyngba ka ‘Short Dura-tion Discussion’ halor ka jingshah thung ka A. Ali kum ka Secretary ka Meghalaya State Council for Technical Education (MSCTE), u Bah Basaïawmoit u la ong ba ki briew ki ïakren ba ki phareng ki la synshar ïa ki paidbah bad la pynbor ïa ki ban mynjur hapoh ka jingsynshar ka India.
“Mynta hadien ba ngi la ïoh ïa ka Jylla lajong, ngin don ka jingkhmih lynti ba ngin shah synshar ha ki Lyngdoh, Sangma, Marbaniang, Kharkongor bad kiwei-kiwei. Hynrei, kaba sniewbok ka long ba ngi la shah synshar ha ki Kumar,” u la ong.
Haba kynnoh ba ka jingthung ïa ka A. Ali kam long katkum ki kyndon bad ka long kaba bakla, u Bah Basaïawmoit u la ong ba ka jingmynjur jong ka Kynhun Myntri haba ïadei bad ka jingthung ïa ka A. Ali ka long ka jingleh bym hok kaba khraw ïa kito ki nonghikai kiba hikai ha ki Polytechnic bapher-bapher.
“Kumno kane ka briew ka lah ban poi sha ka kyrdan Additional Director. Kam dei ban poi lymda ka ïoh ïa ka jingshah liang na ka Sorkar. Te balei kane ka jingshah liang na ka tnad pule-puthi, balei kane ka jingleh kyrpang sha kawei ka briew. Nga sngew ba kane ka mat ba nga pynsngew ka long kaba donkam ïa ka Sorkar ban pyrkhat biang ïa ka rai,” u la ong.
Haba ban biang ba ka Sorkar kan pyrkhat (biang) halor katei ka rai, u la bynrap ba wat la ka long kaba donkam ban burom ïa kiba nabar Jylla hynrei ka Sorkar nyngkong ka dei ba burom shuwa ïa ki briew lajong.
“Nga pyrshah jur ïa ka rai ka Sorkar ban thung ïa kane ka briew kum ka Secretary ka MSCTE,” la ong u Bah Bsaïawmoit.
Haba jubab ïa katei ka bynta, u Myntri ka tnad pule-puthi ka Sorkar Jylla, u Rakkam A. Sangma, u la kyntait ïa kitei ki jingkynnoh bad pynshai ba ka jingthung ïa ka A. Ali kum ka Secretary ka MSCTE kam long pyrshah ïa kino-kino ki kyndon ne rukom.
Haba kdew ba ka Sorkar ka la shim ïa katei ka sienjam da kaba pynleit jingmut ïa ka jingshemphang ha ka kam bad ka jingtbit jong ka Ali, u Myntri u la ong ba ka long kaba donkam ban khmih ïa katei ka bynta naba ka Sorkar ka kwah ban ai da kaba paka sha ki paidbah.
U la ong ruh ba ka jingïalang ka Kynhun Myntri ha ka 25 tarik Nailar ka la mynjur ban thung kam biang ïa ki ophisar hadien ba ki la shongthait katkum ka ‘Office Order’ jong u snem 2008.
Shuh shuh u Myntri u la bynrap, “Ka long kaba donkam ban ïohi jngai ïa kane, ka jingshemphang ha ka kam ka donkam bad ngi hap ban ai ïa kaba paka tam (kaba ngi don) na bynta ki nongshong shnong ka Jylla bad ka Ri.”
