Shillong, Nailur:
U Myntri Rangbah ka Jylla u Conrad K Sangma u la pynpaw ka jingkmen bad pdiang sngewbha ïa ka rai jong ka Sorkar Pdeng ban buh bhah ba 33% ïa ki kynthei ban mihkhmat sha ka ïingdorbar Parliament bad ki ïingdorbar thawaiñ jong ki Jylla.
“Kum ka Jylla kaba ai jait sha ka kmie bad kum u briew uba ngeit ha ka jingpynkup bor ïa ki kynthei, nga da kmen palat halor kane ka aiñ rew (Bill) bad nga pdiang sngewbha ïa ka. Nga thikna ba kane kan lam sha ka jingpynkhlaiñ bad jingmihkhmat jong ki kynthei ha Parliament bad ïingdorbar ki Jylla,” la ong u Conrad haba kren sha ki lad pathai khubor ha ka Sngi Ba-ar.
U Myntri Rangbah u la ong, kane ka rai la thikna ba kum ka jylla baroh kan pdiang ïa ka namar ka dei kawei na ki katto katne ki Jylla ha ka Ri kaba ngeit ha ka jingpynkup bor ïa ki kynthei ha ka imlang sahlang da ka lynti ka jingdon ïa ka jingaijait kmie.Shuh shuh u la pyntip ba shen yn sa khot ïa ka jingïalang ban shim ïa ka rai jong ka sorkar halor kane.
Haba kylli hato kum ki kynthei mynta kin shimkhia ïa ka kam saiñ pyrthei hadien ba kane ka aiñ rew ka la don, u Conrad u la ong ba haba mynta ka la don ka bhah, kumta kane ka aiñ rew kan dei ka bynta ban pynlong ïa ki kynthei ban mih shakhmat, naba ki shynrang kin nym lah ban ïakhun shuh na kito ki jaka ba la bhah kyrpang ïa ki kynthei.
Haba pynpaw ba ka National People’s Party (NPP) kan sa shim rai shen halor kane ka kam, u Conrad u la ong, “Kum ka seng, khlem pep ngin sa shim ïa ka rai halor ka nongrim jong ngi, ngin sa khot ïa ka jingïalang bad hadien kane, ngin sa shim ïa ka rai.”
