New Delhi, Nailur 20 (UNI)
Ka Lok Sabha ha ka Sngi Balang ka la ai jingmynjur ïa ka aiñ kaba la tip kum ka Constitution (One Hundred and Twenty-eighth Amendment) Bill, 2023, na ka bynta ban ai bhah 33% ïa ki kynthei ha Lok Sabha bad ha ki Ïingdorbar Thawaiñ ki jylla.
Ki la don haduh 454 ngut ki MP kiba la kyrshan ïa katei ka aiñ katba arngut kiwei pat ki MP ki la pyrshah.
Katei ka aiñ rew kaba dei kaba nyngkong tam ban ïoh jingmynjur da ka Lok Sabha ha kane ka Dorbar Kyrpang jong ka Parliament, bad ka dei ruh kaba nyngkong tam ba la mynjur hapoh ka Lok Sabha bathymmai.
Ka jingthmu jong katei ka aiñ rew ka long ban ailad ïa kham bun ki kynthei ba kin long ki nongmihkhmat paidbah bad nongthaw aiñ da kaba ai bhah 33% ki konstitwensi Lok Sabha bad Ïingdorbar Thawaiñ ki jylla na ka bynta jong ki.
U Myntri ka tnat aiñ, u Arjun Ram Meghwal, u la wanrah ïa katei ka aiñ rew ha Lok Sabha ha ka Sngi Ba-ar. Haba jubab ïa ki jingïatai halor katei ka aiñ rew, u Meghwal u la ong ba un pynthikna ba kane ka aiñ rew kan ym sahkut ha ki jyrwit-jyrwat.
Haba pynshai ïa ki jingartatien ba kan shimpor palat san snem ban pyntreikam ïa katei ka aiñ, u Myntri Korbar Ri u Amit Shah u la ong ba ka jingpyntreikam kan long mar ïa dep lum ïa ka khanasamari bad kumjuh ruh ka jingpynbeit thymmai ïa ki konstitwensi hadien ka ilekshon MP ka ban long ha u snem ban wan.
Ka nongïalam ka seng Congress, ka Sonia Gandhi ka la sdang ïa ka jingïatai na ka liang ki MP kiba don ha ka Liang Pyrshah. Haba pynpaw ba ka kyrshan ïa katei ka aiñ rew, ka Sonia ka la ong ba dei ban ai bhah lang ïa ki kynthei kiba dei ki Scheduled Caste, Scheduled Tribe, bad Other Backward Classes da kaba pynlong da ka khanasamari (Caste Census).
U MP ka seng Congress, u Rahul Gandhi, u la dawa ba dei ban don ka ‘Caste Census’ bad ka jingpyntreikam ba mardor ïa ka jingai bhah ïa ki kynthei.
Ïa katei kajuh ka aiñ rew yn ïathir bad ïatai hapoh ka Rajya Sabha ha ka Sngi Palei.
