Shillong, Nailur 20
Ha kawei ka jingjia kaba la jia ha ka miet jong ka 19 tarik mynta u bnai katba ki paidbah nongleit nongwan kiba ju ïaid lyngba ka lynti ïaid kjat kaba don pyrshah ka khyrdop jong kawei ka karkhana shna kali, kyndit-kynsan ki la ïohi ïa ka jingtuid jong ka snam kaba mih na katei ka karkhana ha ka dong Mawarling jong ka shnong Laitkor Mawrie.
Haba ïohi ïa katei, kitei ki paidbah ki la suba ba lehse ka don kaei kaei kaba jia hapoh katei ka karkhana. Kumta ki la pyntip noh ïa katei ka jingjia sha ki bor pynïaid shnong bad na ka liang ki bor jong ka shnong mar mar ki la wan poi ha katei ka jaka bad ki la lap pynban ïa kawei ka metïap kaba la thiah lyngktar jong uwei u briew uba trei kum u nongap jong katei ka karkhana uba la tip kyrteng kum u Willam Nongrum uba dei na ka shnong Khanduli, West Jaiñtia Hills District.
Na ka liang ki nongïalam shnong ki la pyntip noh ïa katei ka jingjia sha ki bor pulit ka Madanryting Police Station khnang ban pynlong da ka jingtohkit halor katei ka jingjia. Katba ïa ka metïap jong utei u briew la shimti noh da ki bor pulit ban leh ïa kaba donkam.
Na ka liang ki bor shnong ha ka 20 tarik mynta u bnai ki la ïoh jingtip ba ka jingjia shah pynïap jong utei u briew la suba ba u la shah tied da ki tiar ba nep kum u sdie ne ka wait ha ki bynta jong ka khlieh jong u kat haduh ba ka la pynlong ïa utei u briew ba un khlad noh na kane ka sla pyrthei.
Shuh shuh la ïathuh ruh ba katei ka jingjia la shu antad ba ka la jia ha ka por 8:30 ne 9 baje. Ki bor shnong ki la ïoh jingtip haduh 11 baje mynmiet bad la ïathuh ruh ba hapoh katei ka karkhana ba jia katei ka jingjia la lap ïa ki bilor kyiad bad ka pliang kaba lah ban long ba ka la don ka jingïadih ïabam hapdeng jong u bad ki paralok hynrei ynda ki la buaid pat, ka lah mih ka jingïakynad bad ka jingbym sngewthuh jingmut hapdeng jong ki.
Na ka liang u Rangbah Shnong ka Laitkor Mawrie, u Bah P Mawrie, u la ïathuh ba utei u briew u la wan poi shongkha hapoh katei ka shnong hynrei katkum ka jingïoh jingtip, utei u briew u khlem ïashong ïasah shuh bad ka lok jong u.
Utei u Rangbah Shnong u la ïathuh ba ka daw kaba la pynlong ban poi shaduh utei u pud lehse ka dei na ka jingïabam ïadih bad ka jingbakla para maki.
“Lehse ka dei na ka daw ka jingïabam ïadih bad ka jingbakla para maki, ngim lah ban ong ïa kata hynrei hadien ba la dep ka jingtohkit bniah na ka liang ka aiñ, lehse kan sa paw”, la ong u Rangbah Shnong.
Na ka liang ka Dorbar Shnong ruh ka pynpaw ka jingsngewsih bad ka jingsngewkyndit halor kane ka jingjia namar ka dei ka sien nyngkong hapoh ka shnong ban jia kum katei ka jingjia.
Shuh shuh utei u Rangbah Shnong u la phah ruh ka jingmaham sha baroh ki nongshong shong katei ka thaiñ khamtam sha ki nongai wai ïing ne kiba ai wai dukan ne kiba ai wai ïa ki jaka ki puta ba nangne shakhmat kim dei shuh ban ai wai thurmur khlem da ai jingtip ïa ki bor ka shnong.
