Shillong, Nailur 20
Ka MP ka NPP na Tura, ka Agatha K Sangma, ha ka Sngi Balang ka la pynpaw ïa ka jingkyrshan ïa ka aiñ rew kaba thmu ban ai bhah 33% ïa ki kynthei ha ki Ïingdorbar Thawaiñ kum ka Lok Sabha bad ki jylla.
Haba ai jingkren ha Lok Sabha, ka Agatha ka la pynpaw ka jingsngewnguh ïa ka sorkar u Narendra Modi kaba la wanrah ïa ka aiñ rew ba la tip kum ka Constitution (One Hundred and Twenty-eighth Amendment) Bill, 2023, na ka bynta ban ai bhah ïa ki kynthei ha Lok Sabha bad ha ki ïingdorbar thawaiñ ki jylla.
Haba pynpaw balei la donkam ban wanrah ïa katei ka aiñ, ka Agatha ka la ong, ba ka India ka don ha ka kyrdan kaba 140 napdeng ki 186 tylli ki ri, ha ka jingdon ki kynthei kum ki nongmihkhmat paidbah ha Parliament. Ka la ong ba ka India ka don 15.1% ki kynthei kum ki MP ha Lok Sabha bad tang kumba 13.8% ha Rajya Sabha.
Ka la kdew ruh ba wat ka jylla Meghalaya kaba ki nongshong shnong ki shim jait na ka kmie, ki don tang lai ngut ki kynthei kiba dei ki MLA. Ka la ong ruh ba na ka thaiñ shatei lam mihngi, ki la don tang saw ngut ki kynthei kum ki MP.
