Shillong, Nailur:
U MLA ka Congress na Umsning Dr Celestine Lyngdoh u la pynpaw ïa ka jingsngewkhia ba wat hadien 15 snem ba la dep ban ïoh ei ka jaka hynrei na ka liang jong ka Sorkar kam pat lah satia ban ker ne pynïeng païa kum ka dak ban buh ïa u pud u sam.
Ïa kane u MLA ka Umsning u la pynpaw haba wanrah ka jingkylli ha ki kynta kylli jingkylli hapoh ka ïingdorbar ha ka Sngi Ba-ar, ha kaba u la pynpaw ïa ka jingsngewkhia halor ka jingpynslem ïa ka jingker bad ka jingtei ïa ka Building jong ka Patharkhmah Civil Sub-Division.
U Dr Celestine u la ong ba ïa ka jaka la ai sngewbha sha ka Sorkar da ki shnong ha ka por ba ka Patharkhmah ka dang dei tang ka Administrative Unit, hynrei wat hadien 15 snem ba la leit, ym pat don uwei ruh u païa ba la pynïeng da ka Sorkar Jylla.
“Ka jingbym shimkhia ka sorkar jylla, ka la wanrah ïa ka jingshah kyntur pud jong kane ka jaka, kaba la nangrit nangrit katba nangmih ki sngi, kumta ka sorkar ka dei ban shimkhia ban shu pynïeng shwa tang ki païa lada kam pat lah ban ker kynroh sawdong ïa ka jaka,” u la ong.
Shuh shuh na ka liang une u MLA ka Umsning u la pyntip ruh hapoh ka ïingdorbar ba ki ophisar ba dei khmih ïa ka Patharkhmah Civil Sub-Division ki leit treikam tang ar sien ha ka shi taïew.
“Namar kata, nga kyrpad ïa ka Sorkar ban pynthikna ha kaban tei noh kham kloi ïa ki jingker bad ïa ka building na ka bynta ka Civil Sub Division,” u la ong.
Haba jubab, u Myntri ka tnat General Administration u Rakkam A Sangma u la ïathuh ba ka jaka ba la ai sngewbha sha ka Sorkar ban tei ïa ka building jong ka Civil Sub Division ka long kaba heh haduh 11.864 akar bad pyntip ba ïa mynta kane ka Sub Division ka dang treikam shipor na ka shlem treikam u SDO ka tnat PHE.
