Shillong, Nailur 21
U MLA ka Sohra, u Bah Gavin M Mylliem u la wanrah ha Ïingdorbar ha ka sngi Palei ïa ka mat ban pynsngew ïa ka jingmad jingjynjar bad shem lanot ka ïing ka sem jong u Bah Running Nongkynrih uba la shahsiat ïap ha shnong Mawshun sharum Pynursla bad pan jingïarap na ka Sorkar, hynrei u Symbud Myntri Rangbah u Bah Prestone Tynsong uba peit ïa ka tnat pulit, u la batai pynban ha Ïingdorbar shaphang ka jingjia ha ka miet 5 tarik Jymmang 2023 ha kaba u la ïathuh ba utei u rangbah uba ñiah trok u la shahsiat ïap ha u shipai BSF hadien ba ka trok ka la phet krad wat hadien ba la pynsangeh ha kawei ka jaka talasi (Mobile Check Post) ha surok Pynursla-Dawki hajan ka shnong Wahkdait.
U Bah Gavin u la wanrah ïa kane ha Ïingdorbar ha ka sngi basaw jong ka dorbar synrai lyngba ka Zero Hour notice.
Une u MLA ka Sohra, haba batai shaphang ka jingjia tat haduh ba u Bah Running Nongkynrih, uba dei na ka shnong Jalynteng, u la duh syndon ïa ka jingim namar ka jingshahsiat ha u shipai BSF, u la ong ba ka ïing jong u Bah Running ka khlem ïoh jingïarap ei ei na ka Sorkar, la ka dei na ka Sorkar Pdeng ne Sorkar Jylla bad ka ïing ka mad jingeh haduh katta katta namar ka la duh ïa u kpa ka ïing.
U Bah Gavin u la kyrpad ruh ïa ka Sorkar Jylla ban ai jingïarap lane ‘ex-gratia’ ïa kane ka longïing kaba mad jingeh namar ka kurim bad ki khun jong u Bah Running ki shem jynjar bad ïakynduh jingeh namar ym don shuh u nongkyrshan ïa ka ïing.
U la ong ba ka kam kaba dei bad ka jingtohkit bad jingpynshitom kan ïaid katkum ka aiñ, hynrei ka ïing jong u Bah Running kynthup ki khun jong u kiba dang rit, ki donkam palat ïa ka jingïarap namar la saw bnai mynta ka la ïaid, hynrei khlem don kano kano ka lad jingïarap na ka liang ka Sorkar.
Haba ïeng ban ai jubab, u Bah Prestone uba la batai shaphang kaei kaba la jia ha ka 5 tarik Jymmang, 2023 ha ka por 10.20 mynmiet, u la ong ba ka ejahar pyrshah ïa u shipai BSF u bym shym la tip kyrteng, la ujor ha Thanat Pynursla da u bahaïing jong u Bah Running Nongkynrih, kata u Riverskhem Nongkynrih.
La ong ba ka trok kaba ñiah da u Bah Running ka dei kaba kit muid bad ka trok ka la mih na shnong Umthli, Laitlyngkot ban leit pynhap sha ka sem jong u trai muid.
Hynrei ynda la poi ha Mawshun, u shipai BSF uba shong ha ka trok BSF kaba bud nadien jong ka trok kaba ñiah u Bah Running u la synreit kuli bad poi sha u pud ban ïap u Bah Running.
Shuh shuh u Bah Prestone u la batai shaphang ka jingsynreit kuli u shipai BSF ha kaba na ka liang ki shipai BSF ki la ujor kylla pyrshah ïa u Bah Running da kaba kynnoh ba u la phet ryngkat ka trok ha katei ka miet 5 tarik Jymmang, 2023 haba talasi bad bthah ïa ka trok ban sangeh da ki shipai BSF jong ka 4th Battalion kiba ap pahara ha surok Pynursla-Dawki hajan ka shnong Wahkdait.
U Bah Prestone u la ong ba haba u nongñiah jong ka trok u la phet, u la tynrah ruh ïa ki shipai BSF kiba ap pahara. Kumta u shipai BSF u la sngewthuh ba don ka jingma ïa u bad u la siat arsien sha suiñ hynrei u nongñiah trok u khlem sangeh bad pyrshang tynrah ïa u.
Kumta, ynda la ïohi ba ka jingim jong u ka don jingma, uta u shipai BSF u la siat biang shisien sha ka shaka jong ka trok hynrei u nongñiah u la khun sha kadiang bad tyngkhuh.
U Bah Prestone u la ïathuh ba haba ïadei bad ka ejahar ba ujor ki heh shipai BSF, la dep pynrung bad dang ïaid ka jingtohkit.
U la bynrap ruh ba ha baroh ar tylli ki ejahar ba la dep ujor na baroh arliang, ki pulit ki dang tohkit ban pyntikna ïa ki jingshisha bad kaei kaba jia.
Hynrei u Bah Prestone u khlem ai jubab ne kren ei ei haba ïadei pat bad ka jingpynsngew jong u MLA ka Sohra ban ïarap lem ka Sorkar ïa ka ïing ka sem jong u Bah Running Nongkynrih.
