Shillong, Nailur:
Ki nongïalam ka NEHUSU mynta ka sngi ki la leit ban ïakynduh ïa u Vice-Chancellor ban dawa ba u dei ban pynkhlaiñ ki bor pahara ne security ha ki jaka sah jong ki khynnah hostel kiba pule ha NEHU khnang ban nym mih kano-kano ka huri-hura.
Kane ka jingleit ïakynduh ka NEHUSU ïa u VC-NEHU ka dei namar ha ka janmiet jong ka 18 tarik mynta u bnai ha ka por kumba 9 baje eiei ka la mih ka jingïakulmar bad ka jingïashoh ïadat ha kawei na ki jaka sah jong ki khynnah shynrang kaba don hapoh ka skulbah NEHU.
Ha kane ka jingjia la suba ba kane ka jingïakynad ka dei tang hapdeng ka jingïarah-kti bad ka thma ktien jong ki khynnah kaba la wanrah pynban ka jingpynjulor ïa ki jingkhang ïit ka hostel ki ïit kali jong ki briew kiba pynïeng hajan ka jaka sah jong kine ki khynnah shynrang.
Katkum ka khubor ba la ïohlum la ïathuh ba kane ka jingkulmar ka la mih ha ka kamra ba 19 jong ka hostel ïa kaba la tip kum ka Rang-gira Hostel.
Shuh shuh la ong ruh ba ha kane ka huri-hura la don 4 ngut ki khynnah kiba la mynsaw malu-mala bad ïa ka jingïakynad la lah ban tem tat ynda la wan poi ki pulit na Mawkynroh Outpost ha ka por 11 baje mynmiet.
Katkum ka jingbatai ki nongïalam ka NEHUSU ki la ïathuh ba kane ka dei ka jingjia kaba rit tang ki khynnah ba sah hostel, hynrei namar ka jingïakhluit para khynnah ka la poi sha ka ïashoh ïadat. Kumta ki la kyntu ïa u VC ba un pynkhlaiñ shuh ïa ki nongpahara ha NEHU namar haduh mynta ki don ki nongpahara tangba ki don tang khyndiat.
