Shillong, Nailur:
Ki nongmihkhmat ka liang pyrshah ha ïingdorbar ha ka Sngi Ba-ar ki la pynpaw ïa ka jingsngewkhia halor ka jingkynrei ki kam dih drok hapoh ka Jylla bad ai jingmut sha ka Sorkar ban shim ïa ki sienjam kiba tyngeh khnang ban teh lakam ïa katei ka jingsniew.
U MLA ka Voice of the People Party (VPP) na Nongkrem, Bah Ardent Miller Basaïawmoit haba wanrah ïa ka ‘Motion’ ïatai halor ka jingkynrei u drok bad ka jingngop ha ki jingdih pynbuaid hapoh ka Jylla u la ong ba kin don bun bah ki daw halor kane ka bynta ba kynthup ïa ki rukom bym ïahap ha ka ban teh lakam ïa kito kiba la ngat ha ki kam sniew, ka jingjem jong ka aiñ, ka jingkylla ha ka rukom im ki jaidbynriew trai ri, ka jingbym don ka jingtehsong ha ki longïing, ka jingbymtieng shuh ïa ki Dorbar trai-ri nalor kiwei-kiwei.
“Kumba ka long mynta, ngi ïohi ba ki nongkhaïi drok ki long kham hakhmat ïa ka Sorkar ha ka liang ki buit treikam halor kumno ban bteng ïa ka jingpynsaphriang,” u la ong.
Haba kdew ba ka jingkynrei ha ki kam dih drok ka la nang kiew katba nang mih ki sngi, u Bah Basaïawmoit u la ong ba kane ka jingsniew ka la rung wat sha ki kyndong-kynshrot jong ka Jylla khamtam ha Ri-lum Khasi-Jaiñtia.
Ha kajuh ka por, haba pynsngew ba ka jingdon jong ki nongpyndonkam drok la lap ha ki bynta bapher-bapher jong ka imlang-sahlang, utei u MLA u la ong ba lada hap ban jop ïa ka thma pyrshah u drok, ka Sorkar kan hap shim ïa ki sienjam ki ban kynthup ïa baroh ki liang.
U la ong ruh ba ka Sorkar ka dei ban wanrah ïa ki kyndon aiñ kiba kham tyngeh khnang ban pynshitom ïa kito kiba donkti ha ki kam khaïi drok.
Haba kren halor ki kyndon bapher-bapher jong ka Narcotic Drugs and Psychotropic Substances Act, 1985 (NDPS), u Bah Basaïawmoit u la ong, “Lada ka Sorkar ka pyndonkam ïa ki kyndon jong kane ka aiñ, nga tikna ba ngin sa lah ban jop ïa kane ka thma pyrshah u drok.”
Na ka liang jong u, u la ai jingmut ruh ïa ka Sorkar ban wanrah bun tylli ki De-addiction Centre hapoh ka Jylla – ka ban ïarap shi kat dei ïa kito kiba la ngop ha ki kam dih drok khamtam kito kiba wan na ki longïing ba duna ka ïoh ka kot ki bym kot bor ban sumar ha ki jaka shimet.
“Ka Sorkar ka dei ruh ban pynithuh ïa ki jaka ba them bha ka jingkhaïi drok kumjuh ban pynithuh ïa ki snar nongkhaïi ha kane ka kam,” u la ong.
U MLA ka Congress na Mawhati, Bah Charles Marngar uba la kyrshan bad ïashim bynta lang ha katei ka jingïatai u la ong ka jingkynrei ha ki kam dih drok ka long kum ka khlam na bynta kiba bun bah ki khun samla ka Jylla.
Halor ka NDPS Act, u la ong ba kane ka aiñ kam da don ki kyndon pyrkhing kiba tyngeh ban tehlakam ïa ki nongpyndonkam kumjuh ïa ki nongkhaïi drok.
“Kane ka paw shai ba tang hapdeng khyndiat por, hadien ba shah kem, ngi ïohi ba kiba shah kynnoh donkti ki la ïoh jamin ne ki la lait noh. Kumta nga kyrpad ïa ka Sorkar ban rah mardor ïa kane ka mat sha ka Sorkar Pdeng ban khmih bniah ïa ka NDPS khnang ban lah kynthup shuh ïa ki kyndon aiñ kiba tyngeh pyrshah ïa ka jingai jamin ïa ki nongkhaïi bad nongpyndonkam kumjuh,” u la ong.
U Bah Marngar u la ai jingmut ruh ïa ka Sorkar ban thaw ïa ki komiti ha ka kyrdan jong ki District Council bad Deputy Commissioner haba ïadei bad katei ka bynta.
Kumjuh, u MLA Congress na Nongstoiñ, Bah Gabriel Wahlang haba ïeng ban kyrshan ïa katei ka mat, u la ong ba wat la ka tnad pulit bad ki bor distrik ki ïaleh katba lah ban tehlakam ïa ki nongkhaïi lem bad ki nongpyndonkam, hynrei u la pynpaw ba kam don ka aiñ ka ban khang lad ïa ki ban ym leh shuh ïa katei ka kam sniew.
Utei u nongmihkhmat u la ai jingmut ba ka Sorkar ka dei ban ïaid shakhmat bad ka jingjurip ha man la ki jaka jong ka Jylla, ha kajuh ka por ban pynkhlaiñ ïa ki prokram ai jinghikai na bynta ki Rangbah Shnong bad dkhot Executive ki Dorbar Shnong, ka jingïasyllok bad ki kmie ki kpa bad ka jingpeitngor kaba na ka por sha ka por na ka liang ki pulit ïa ki nongkhaïi bad nongpyndonkam la ki dang bteng ne em ïa katei ka jingmlien ba sniew.
Shuh shuh u Bah Wahlang u kyrmen skhem ba ka projek DREAM jong ka Sorkar kan sa lah ban kynjoh ïa ka thong – ban pynlong ïa ka Jylla kaba lait na u drok.
