Shillong, Nailur 21
Ka Executive Committee jong ka KHADC hapoh ka jingïalam u Bah Pynïaid Sing Syiem kum u CEM kaba la shong jingïalang kyrkieh mynta ka Sngi Palei ka la rai ban khot da ka dorbar kyrpang ban wanrah ïa ki katto katne ki jingpynlut na bynta ban pynkhreh ïa ka Monolith Festival ka ban long ha Khasi Heritage Village kaba don ha Mawphlang, East Khasi Hills District.
Haba ïakren bad u Bah Pynshngaiñ N Syiem uba dei u Deputy CEM ka KHADC, u la ïathuh ba kane ka dorbar kyrpang kan long ar sngi ka ban sdang naduh lashai ka sngi ka 22 tarik Nailur, 2023.
U Bah Pynshngaiñ u la pyntip ban khot ïa ka dorbar kyrpang ka long ban wanrah ïa ka supplementary demand kaba donkam kyrkieh ban pynlut pynsep na ka bynta ban pynlut ha ka monolith festival wat la ïa ka jinglut jingsep la pynlut khambun da ka tnad shangkai pyrthei ka sorkar jylla bad khyndiat eh na ka KHADC.
U la ïathuh ba ka KHADC ka la buh khyndiat ka pisa namar ïoh donkam kyrkieh hangne hangtai hynrei ka jinglut baroh ka dei na ka sorkar jylla.
Shuh shuh u la pyntip ba na ka jingmih na kane ka monolith festival yn shong ka tnad shangkai pyrthei bad ka KHADC ban ïa pynbeit lang.
U la ïathuh ba ha kane ka dorbar kyrpang yn wanrah ruh ban ai baibam tymmen ïa ki MDC, nangta yn pynrung ruh ïa ka jingpynlut ha ka tnad Legislative, ka tnad pule puthi.
Nangta u la pyntip ban wanrah ruh ïa ka jingpynbeit thymmai kaba arsien ïa ka Elka Administrative ban pynrung lang ïa ka kyrteng Seng Samla shnong, Seng longkmie, ka Social Vigilan Committee, Dorbar shnong, Dorbar Dong ban lum kyrteng ïa uwei pa uwei u nongshong shnong bad kiba wan sah wai ruh kumjuh.
Nalor kane, u la ong ba ka jingpynbeit thymmai ïa ka Elaka Administrative ka long ban ïada na ka jingwan buhai shnong kiwei ki jylla khamtam ka jingjia ha Manipur nangta ka jingjyllei ki jingdih kiba sniew bad ki kam runar.
