Shillong Nailur:
Ki MLA kynthei ha Jylla ki la pynpaw ka jingsngew kmen bad pdiang sngewbha ïa ka aiñ-rew kaba la wanrah da ka Sorkar Pdeng ha Ïingdorbar Lok Sabha na ka bynta ban bhah 33 na ka 100 ïa ki kynthei ba kin long ki dkhot ka Ïingdorbar Thawaiñ jong ka ri bad jylla.
U Myntri Rangbah ka Jylla u Conrad K Sangma ruh u pynpaw ka jingkyrshan ïa kane ka aiñ-rew kaba dei ka jingpynkupbor ïa ki kynthei ha ka ri.
Lada ïa kane ka aiñ la mynjur da baroh ar tylli ki Ïingdorbar Thawaiñ ka ri, kita, ka Lok Sabha bad Rajya Sabha, bad ynda la ai jingmynjur lang sa ki Ïingdorbar Thawaiñ jong ki Jylla, kamut ba ha Meghalaya, ki kynthei kin ïoh bhah ban mihkhmat ym duna ïa ka 19 tylli ki konstitwensi.
Ïa kane ka aiñ-rew kaba tip ha ka ktien Hindi kum ka ‘Nari Shakti Vandan Adhiniyam’ la wanrah ha Ïingdorbar Lok Sabha ha ka Sngi Ba-ar da u Myntri ka tnat aiñ jong ka Sorkar Pdeng, u Arjun Ram Meghwal.
Ka Kong Ampareen Lyngdoh, kaba dei ka MLA ka NPP na East Shillong konstitwensi bad ruh tang maka ka kynthei kum ka Myntri Sorkar, ka pynpaw ka jingkmen bad ka la ong ba ka por ka la poi ba kham bun ngut ki kynthei kin sdang pynkhreh ban long ki dkhot ka Ïingdorbar Thawaiñ ka Jylla bad ban ïashimbynta ha kiba bun ki mat ban ïatai.
“Nga khmih lynti ban ïohi kumba 20 ngut ki MLA kynthei ha kane ka Ïingdorbar Thawaiñ ha ki snem ban sa wan,” la ong ka Kong Ampareen, kaba la pynpaw ba ki don bun ki kynthei kiba smat bad trei shitom lyngba kane ka aiñ, ki rangbah ruh kin hap ai jaka lem ïa ki kynthei ban mihkhmat na ki konstitwensi kiba yn sa jied.
Ka Kong Ampareen kaba la shahjied lynter kum ka MLA naduh u snem 2008 haduh mynta ka la ai khublei ïa u Myntri Rangbahduh ka ri, u Narendra Modi bad ka Kynhun Myntri namar ka jingmynjur ban wanrah ïa kane ka aiñ-rew ban ai bhah ïa ki kynthei ban long nongthaw aiñ.
Ka aiñ-rew ban ai bhah lang ïa ki kynthei ban long ki dkhot jong ki Ïingdorbar Thawaiñ ka dei kaba la wanrah naduh ka por jong ka Sorkar Congress bad ka la shu sahteng khlem pynïaid shuh shakhmat tat haduh mynta.
Ka Kong Santa Mary Shylla kaba dei ka MLA ka NPP na Sutnga-Saipung konstitwensi ka ong ba ka dei ka sngi sahkynmaw ïa ki kynthei ba wanrah ïa kane ka aiñ bad ka kyrmen ba yn sa pyntreikam noh kloi ïa kane ka aiñ.
Na ka liang u Myntri Rangbah u Conrad K Sangma u la ong ba kum ka Jylla kaba shim jait ruh na ka kmie, u kyrshan ïa kane ka aiñ rew bad ka dei kaei kaei ka ban long ka jingpynkupbor ïa ki kynthei bad kan ïalam sha ka jingpynkhlaiñ ïa ka jingïoh mihkhmat ki kynthei la ka dei ha Parliament ne State Assembly.
Kumta u la ong ba shen yn sa lum ïa ka jingïalang bad ban rai ha Ïingdorbar Thawaiñ ka Jylla.
Kane ka bhah ïa ki kynthei ha Ïingdorbar Thawaiñ kan sa treikam hadien ba la pynbeit thymmai ïa ki konstitwensi bad kino kino ki konstitwensi kaba dei ban mihkhmat da ki kynthei, ki dei ban kylliang haba poi ka por ban pynbeit thymmai ïa ki konstitwensi.
