Shillong, Nailur 21
Ha ka jingïakhun pyrshah ban rat dyngkhong ïa u drok napoh ka jylla, ki pulit ha ka miet jong ka sngi Balang ki la ïoh ban kurup ïa u drok ba shongdor haduh T.2 klur na kawei ka kali Tata Sumo.
Katkum ka khubor ba la pyllait da u SP ka East Khasi Hills la ong ba ha ka miet jong ka 20 tarik mynta u bnai, u nongñiah jong kawei ka kali Tata Sumo hadien ba u la lap ïa kawei ka pla ba la shu ieh da ar ngut ki nongshong kali hapoh ka kali, u la pyntip mar-mar sha ki pulit.
Ïa kane ka pla la peit bniah bad talasi noh da ki pulit hapoh ka thanat ha Madanrting bad ha kaba la lap ïa haduh 21 tylli ki synduk buh sabon, ha kaba la thep bha ïa u drok heroin uba khia haduh 253.53 gram ryngkat bad ki katto katne ki jaiñ phong.
La ong ba une u drok ba la ïoh kurup u dei uba shongdor palat T.2 klur. Ha kaba ïadei bad kane, la dep ban pynrung ïa ka case lyngba ka Madanrting P.S Case No. 97(09)2023 U/S 21(c)/29 NDPS Act bad mynta ka jingïaleh ban kem ïa ki briew ba donkti ha kane ka kam, ka la ïaid shakhmat.
