Khliehriat, Nailur 21
Namar ka jingshah thok shah shukor kaba man ka por ha ki karkhana pynmih dewbilat kiba don ha ka thaiñ East Jaiñtia Hills District, ka seng ki trai trok hapoh ka lama Jaiñtia Hills Truck Owner Association (JHTOA) ka la pynbna ba kan pynlong da ka jingïakhih ban khanglad ïa ki trok jong ki karkhana ban kit cement kit clinker ban leit buh ïa ki mar ki mata jong ki.
Haba kren sha ki lad pathai khubor, u President ka JHTOA u Bah Biangshwa Shylla u la ïathuh ba kane ka jingïakhih kan sdang ha ka 5 tarik Risaw naduh ka por 10.00 baje mynstep.
Ïa kane ka rai ïakhih la shim ha ka jingïalang kaba la long ha Tuber Takhniang ha ka 19 tarik Nailur. Ka daw kaba pynlong ïa ka seng ban shim ïa kane rai ka long namar ba ki karkhana ki la thok la shukor palat ha kaba ïadei bad ka kit ka bah.
U Bah Biangshwa Shylla u la ong baroh ki karkhana dewbilat kiba mih na Lumshnong, Thangskai bad Wahiajer kim shym la bud ryntih ïa ka jingïakut ban kit mar kata ka dewbilat bad ka dew clinker.
U la ong ba ka JHTOA kam banse ban shim ïa ka rai ban ïakhih paidbah namar ka jingleh khlieh shrieh kine ki karkhana dewbilat bad pynduh lad ïa ki trai trok trai ri trai muluk ban ïoh kamai na ka kit ka bah.
U la pynkynmaw ruh ba ka JHTOA ha ki 2 snem ba ladep, ka la pynlong ïa kiba bun ki jingïakhih pyrshah ïa ki karkhana bad na ka liang ka sorkar MDA ruh ka la pynmih ïa ka byrta (notification) jong ka bai kit bai bah kaba long 7 tyngka shi kilomitre.
U la ong ruh ba ha ka jingïalang bad u DC ka East Jaintia Hills ruh la mynjur ban ai ban kit ban bah ki trok hapoh ka lama ka JHTOA kumba 60 tylli ha ka shi sngi, hynrei ki ïoh tang kumba 15 tylli ki trok ha ka shi sngi.
Kumta ka JHTOA ka la shim ïa ka sienjam bad rai ban ïaid shakhmat ban ïakhih paidbah bad khang ïa ka kit ka bah ki trok dewbilat.
