Shillong, Nailur 21
U Myntri Rangbah ka jylla u Conrad K Sangma u la pyntip hapoh ka ïingdorbar ba na ka liang ka Sorkar wat la kam shym la ïoh ka jingtip kaba bniah na ki pulit syntiat hynrei ka la pynkhlaiñ ïa ki bor pahara ha ki jaka khappud ka Meghalaya, Assam ha ka thaiñ Block-I hadien ba ka la don ka jingkynnoh ba la mih paw ka kynhun kieng atiar bathymmai jong ki jaidbynriew Karbi, kata ka United People’s Front of Karbi Longri (UPFKL).
Ïa kane u Myntri Rangbah u la pyntip haba jubab halor ka mat ‘Call Attention’ ba la wanrah da u MLA ka UDP na Mowkaiaw u Bah Nujorki Sungoh ha ka Sngi Palei hapoh ka ïingdorbar.
U Conrad u la ong ba wat la ki la ïohsngew ïa kane ka khubor, hynrei kim pat shym la ïoh satia ïa ka jingtip kaba thikna lane ba kan don ka jingujor da kino kino ki nongshong shnong halor ka jingshah dawa pisa ha ki dkhot jong katei ka kynhun.
“Wat la katta, hadien ka jingsakhi lyngba ki lad pathai khubor halor ka jingmih jong kane ka kynhun, na ka liang ka sorkar ruh ka la pynkhlaiñ shuh shuh ïa ki bor pahara ha ki thaiñ Block-I,” la ong u Conrad.
U la ong ruh ba nalor kane, ka la don ka shithi ujor ba la ai da ka seng Jaiñtia Students Movement (JSM) halor kane ka kam bad dei halor kane ba ka Sorkar ka la shim khia bad ki pulit lem bad ki bor District ki la trei khlem shongthait ban pynthikna ba ka jingshongsuk kan don ha ki jaka khappud.
U Conrad u la ong ba ka jingsngewkhia ba la pynpaw da u MLA ka Mowkaiaw ka dei kaba kongsan. Ka histori jong ka Block I bad Block II ka dei kaba la ïatip da baroh ba ka jingpynkynriah ïa ka Block I bad Block II ka dei tang namar ka jingsuk ha ka synshar khadar. Kane ka dei kaba don ha ka jingthoh ha ka Sorkar Meghalaya, ka Sorkar Assam bad ka Sorkar India.
Haba pyntip ba ka sorkar Meghalaya bad Assam kin ïakynduh biang ha ka taïew kaba nyngkong ne ba ar jong u Risaw na ka bynta ka jingïakren, u Conrad u la ong, “Kan don jingpynleit jingmut ba kyrpang ha kaba ïadei bad ka thaiñ Khanduli, Psiar, Block I bad Block II namar ki la don ki jingïakynad ba malu-mala ha kine ki jaka.”
Halor ka jingkyrpad jong u Bah Nujorki ban shna ïa ka surok ha Khatkhasla bad ki bynta ka Mojem, u Conrad u la ong, “Nga la ïakren bad u Symbud Myntri Rangbah uba la pyntip ba ka jingpynkhreh ïa ka Detailed Project Report (DPR) ka la sdang. Kumta ka la don ka jingshim kam halor kane. Hynrei, lada ki don ki bynta jong ka surok kiba ngat ha ki jaka kajia, ki lah ruh ban don katto katne ki jingeh.”
Halor ka jingkyrpad ban buh ïa ka PHC ha Psiar bad Moolber, u Conrad u la ong ba kine ki shnong kiba hap ha ki jaka kiba mih ka jingïapher jingmut, hynrei na ka liang ka sorkar kan pynthikna ba ki paidbah nongshong shnong kim dei ban ngat ha ki jingeh.
Ha shwa kane, haba wanrah ïa ka ‘Call Attention’ u MLA ka Mowkaiaw u la kynnoh ba ka jingthmu jong kane ka kynhun kieng atiar bathymmai ka long ban pyntieng pynsmiej ïa ki Khasi Pnar kiba shong ba sah ha ki thaiñ Block I, kata ha khappud hapdeng ka West Jaintia Hills bad ka West Karbi Anglong khamtam ha ki bynta jong ka Elaka Labang-Nongphyllut-Pangam Raliang.
