Nongpoh, Nailur 21
Ha kawei ka jingjia tyngkhuh kali ha Ri Bhoi ha ka miet sngi Balang, kawei ka trok kit tyndong lyer kaba don ïa u number AS04-4201 ka la pra phom na ki bynta ba shakhmat ha ka surok bah National Highway ha ki bynta jong ka shnong Pahamrioh ha Ri Bhoi District.
Kumba la ïoh lum jingtip na ki pulit, la ïathuh ba katei ka jingjia ka la jia ha ka por 10:30 mynmiet katba katei ka trok kaba la ñiah da u Achik Barbuyia kaba la wan na ki thaiñ Silchar ban leit sha nongbah Guwahati. Ynda la poi ha katei ka jaka, ka la leit ban tynrah nadien ïa kawei ka kali ka bym lah satia ban tip kat haduh ba utei u nongñiah bad u nongbud uba la tip kyrteng kum u Sunil Nath ki la mynsaw jur.
Hadien katei ka jingjia, ïa u Achik Barbuyia bad u Sunil Nath kiba dei na ka Cachar jong ka jylla Assam la pynkit noh sha Civil Hospital Nongpoh na ka bynta ban pynïoh ïa ka jingsumar, hynrei utei u nongñiah u la khlad noh ynda poi ha katei jaka sumar.
Halor kane ka jingjia, na ka liang ki pulit ka thanat Nongpoh ki dang pynlong ïa ka jingtohkit ban lap dien halor katei ka jingjia bad ruh ban lap ïa ki jingshisha baroh.
