![U Nongsaiñ Hima - Khubor Khasi](https://unongsainhima.com/wp-content/uploads/2023/02/splash-screen-720x405.webp)
New Delhi, Nailur 21
Ka Ïingdorbar Thawaiñ Rajya Sabha ha ka Sngi Palei ka la ai jingmynjur ïa ka aiñ rew ban bhah 33% ki konstitwensi Lok Sabha bad Ïingdorbar Thawaiñ na ka bynta ki kynthei.
Hynnin ka sngi, ka Lok Sabha ka la ai jingmynjur ha kaba 454 ngut ki MP ki la kyrshan katba arngut pat ki la pyrshah. Mynta haba ka Rajya Sabha ruh ka la mynjur, kane ka aiñ rew ba la tip kum ka “The Constitution (One Hundred and Twenty-eighth Amendment) Bill, 2023” kan poi sha ka miej jong ka President ka Ri India ba kan soi, bad hadien kata, kan sa long aiñ pura.
Hapoh Rajya Sabha, ym shym la don wat tang uwei ruh u MP uba la kyntait ban ai jingkyrshan.
Kumba long ha Lok Sabha, ka jingïathir hapoh Rajya Sabha ka long halor lano yn pyntreikam ïa katei ka aiñ namar katkum ki kyndon jong katei ka aiñ rew, yn lah ban pyntreikam ïa ka jingai bhah ba 33% ïa ki kynthei tat ynda la pyndep ïa ka jingpynbeit thymmai ïa ki konstitwensi bad ka khanasamari. La kumno-kumno, kan shimpor haduh hynriew snem ban ïoh pyntreikam ïa kane ka aiñ katba ki seng kiba don ha ka kynhun synrop INDIA ki kwah ba dei ban pyntreikam noh mardor ïa ka.
Na ka liang u Myntri Rangbahduh, u Narendra Modi, uba la don ha Rajya Sabha ha ka por ba la mynjur ïa katei ka aiñ rew, u la ong, “Ki jingïatai ki long kiba jop. Ha ki sngi ki ban wan, kane ka jingïatai kan ïarap ïa ngi baroh. Nga ai khublei ïa baroh ki MP kiba la kyrshan ïa kane ka aiñ rew.”
“Kam dei kaba eh ban wanrah jingpynkylla ïa kane ka aiñ. Ka sorkar ka lah ban leh noh mynta hynrei ka la buh teng haduh 2031. Ka mut aïu kane?” la ong u Nongïalam ka Liang Pyrshah ha Rajya Sabha, u Mallikarjun Kharge jong ka Congress.
U MP ka Trinamool Congress, u Derek O’Brien u la kynnoh ba ka BJP kam don jingthmu satia ban pynkup bor ïa ki kynthei. “Ka BJP ka khlem lah ban ïoh wat tang kawei ka ’riew kynthei ha ki 16 tylli ki jylla ba synshar ka NDA ban long kum ka Myntri Rangbah,” u la ong ha Rajya Sabha.
U Myntri Sorkar Pdeng barim, u Kapil Sibal, u la ong, “Ngim tip mano ki ban wan ha ka bor, hynrei ki dei ban kren ba lada kim lah ban pyndep ïa ki jingdonkam kiba ïadei bad ka jingpyntreikam ïa katei ka aiñ rew hapoh u snem 2029, kin hap ban hiar na ka shuki Myntri Rangbahduh bad Myntri Korbar Ri.”
Hynrei, ka Myntri Sorkar, ka Nirmala Sitharaman, ka long ba ka BJP kam ju pynkylla saiñpyrthei ïa ki mat kiba ïadei bad ki kynthei.
Hynnin ka sngi ha Lok Sabha, u Myntri Korbar Ri, u Amit Shah, u la ong, “Ka Delimitation Commission ka dei ka tnat kaba donkam ha ki kam ilekshon ha kane ka Ri. Lada ngi ai bhah 33%, mano ban pynbeit ïa kata? Lada leh hi ma ngi, ka Liang Pyrshah kan sa buh jingkylli.”
Ynda katei ka aiñ kan treikam pura, ka jingdon ki MP kiba dei ki kynthei ha Lok Sabha kan kiew na ka 82 ngut kumba ka long mynta, sha ka 181 ngut.