Shillong, Jylliew 29
Ka Voice of the People Party (VPP) ha ka 29 tarik u Jylliew 2026, ka la leit ban ïakynduh ïa u Chief Secretary ka Sorkar Jylla, u Shakeel P Ahmed, halor ka ki jinglap ba la don ka jinglehtuh ha ka rukom thungkam ka District Selection Committee (DSC), ka West Jaiñtia Hills District.
Hynrei namar ka jingbymdon u Chief Secretary, ki la aiti noh ïa ka shithi ha ka ophis treikam jong u bad hadien kane, ki la lah ban kynduh ïa u Bah Cyril V. Diengdoh, Commissioner & Secretary ka tnad Personnel, ban ïakren halor kane ka kam.
Haba kren sha ki lad pathai khubor, u Bah Brightstarwell Marbaniang, MLA ka Mawlai Konstitwensi, u la pynpaw ba ka la don ka jingleh tuh haba ïadei bad ka rukom thungkam ha ka Grade IV bad Lower Division-cum-Typist.
Kumta ka VPP lyngba u Bah Bright, ka la dawa ban pynsangeh noh ïa kane ka jingthungkam bad ban pynbeit shuwa.
“Lyngba ki sakhi sabut kaba ka VPP ka la ïoh ban pdiang, ki la don ki Samla ki bym dei hok ban ïoh hynrei ki la shah khot ban leh ïa ka interview, katba kiba dei ban ïoh pat ki duh noh,” la ong u Bah Bright.
Nalor kata, u la dawa ruh ba dei ban pynlong da ka jingtohkit kaba bniah bad ban aiti ïa kane ka kam sha ka CBI bad kumjuh ruh ban sangeh shuwa ïa ka jingthung kam, katba ym pat lah ban pynbeit ïa katei ka kam.
“Ka jinglap ka VPP halor kane ka kam, kadei kawei lehse ka kam lehtuh kaba shyrkhei bha ha ka DSC exam. Ngi don katto katne ki jingtip ban pynshisha ba ka don shisha ka jinglehtuh ha katei ka kam, ba kumno la shu pyn pass jubor ne pynrung jubor ïa ki kyrteng ki bym dei hok ban ïoh. Kane ka lah ruh ban ktah ïa ka hok jong kiba leh ïa ka hok, kiba pyrshang na ka jinglah lade bad ban pynduh pat ïa ki Samla wad kam, kiba dei hok ban ïoh,” la bynrap u Bah Bright.
U Bah Bright u la kdew ruh, ba lyngba ka OMR Sheet kaba la ïoh pdiang, ka long kaba lehraiñ ba kin pass bad ban shah khot sha ka interview.” Ngi don ki sakhi ban pynshisha ïa ka jinglehtuh ban pynrung jubor ïa ki kyrteng.”
