Shillong, Jylliew 29
Ki bor District ka East Khasi Hills District kin sdang ïa ka jingleit rung thliew ïing naduh ka 30 tarik Jylliew ban leh ïa ka Special Intensive Revision (SIR) kum ka sienjam ban pynshisha ïa ki kyrteng jong ki nongthep Vote ha ka Electoral Roll kiba don ha baroh ki Constituency ba hap hapoh ka District.
Haba kren sha ki nongthoh khubor u Deputy Commissioner (DC) ka East Khasi Hills Abhilash Baranwal u la kyrpad ïa baroh ki nongthep vote ba kin shimkhia bad ban ai ka jingïatreilang ha ka jingleh ïa ka SIR ka ban sdang naduh ka 30 tarik Jylliew bad bteng haduh ka 29 tarik Naitung.
U Abhilash u la ong ba kane ka jingleit rung ha man ki thliew ïing da ki Booth Level Officers (BLOs) ka dei katkum ka jingbthah ka Election Commission of India (ECI) bad kine ki BLOs kin leit sha man ki thliew ïing kiba don ha baroh ki Constituency kiba hap hapoh ka East Khasi Hills.
U la pyntip ba ki don 1,021 ngut ki Booth Level Officers (BLOs) ki ban leit sha man la ki ïing ban sam ïa ki Self-Enumeration Form kiba la dep pyndap lypa ïa ki nongthep Vote kiba don ha ka thup kyrteng thep vote (Electoral Roll) 2025 bad u DC u la kyrpad ïa ki paidbah ba kin pyndap hok ïa kine ki Form bad ban aiti biang sha ki BLOs.
U Deputy Commissioner u la kyntu ïa ki paidbah ba kin shimkhia ïa kane ka kam bad kim dei ban sheptieng namar ka jingthmu jong kane ka kam ka long ban pynthikna ba ym dei ban don uno-uno u nongthep Vote uba don hok ban shah ïehnoh, hynrei ban pynrung ïa baroh ha ka thup jong ka Electoral Roll.
U DC u la pynshai ba ka jingthmu jong ka Special Intensive Revision ka long ban pynrung ïa ki nongthep Vote kiba don hok ha ka Electoral Roll bad ym ban weng ïa ki. U la bynrap ruh ba kane ka jingleit sha man ki thliew ïing ka long ban pynkhuid, pynbeit bad pynbiang ïa ka Electoral Roll khnang ba kan long kaba thikna bad khlem jingbakla.
U la batai ba ha ka por jong ka jinglum jingtip (Enumeration), ym donkam satia ban aiti kino-kino ki kot jingithuh. Ka kam kaba ki nongthep Vote ki hap ban leh ka long tang ban pyndap bha ïa ka Self-Enumeration Form bad aiti sha u BLO, tang hadien katto katne por bad yn sa kyrpad ïa ki paidbah ban wanrah ïa ki kot jingïoh jingithuh.
Ka Election Commission ka la pynmih ïa ka thup jong 11 tylli ki kot jingïoh jingithuh kum ka jingai nuksa, hynrei kane kam mut ba tang kita ki kot yn pdiang. U Deputy Commissioner u la ong ba la bthah ïa baroh ki BLOs ba kin pdiang ïa kano-kano ka kot kaba wanrah da ki nongthep Vote, kynthup ïa ki Syrnot na ka Balang, na ki Rangbah Shnong lane kino-kino ki kot kiba don jingïadei bad ka rai kaba khatduh halor ka hok jong uno-uno u nongthep Vote kan long ha ka kti jong u Electoral Registration Officer (ERO) hadien ba la bishar ïa baroh ki kot ba la aiti.
Hadien ba kut ka jinglum jingtip, yn sa ai por sa shi bnai ban pdiang ïa ki jingkam kyrteng bad jingpyrshah. Hadien kata, ki ERO kin shim sa shi bnai ban bishar bad rai halor kine baroh shuwa ban pynmih ïa ka Final Electoral Roll ha ka 7 tarik Risaw 2026.
U Deputy Commissioner u la ong ba ka 2005 Electoral Roll ka dei ka nongrim jong kane ka jingjurip namar ka dei ka sien kaba khatduh ba ka Election Commission ka la pynlong ïa ka Comprehensive Revision jong ka Electoral Roll ha ka ri.
La pyntip ruh ba ki paidbah ki lah ban pyndap ïa ka Self-Enumeration Form lyngba ka Website jong ka Election Commission of India. Ki paidbah kiba donkam jingïarap ki lah ban phone sha u BLO jong ki, lane sha u Helpline jong ka Election Commission 1950. Nalor kata, ka District Administration ka la buh ruh ar tylli ki helpline number ban ïarap ïa ki paidbah, kata 0364-2501255 bad 0364-2501228.
U Deputy Commissioner u la kyntu ruh ïa baroh ki samla kiba la dap 18 snem bad kiba ym pat don kyrteng ha ka Electoral Roll ba kin pyndap ïa ka Form 6 khnang ba yn lah ban pynrung ïa ki kum ki nongthep vote.
