Shillong, Jylliew 29
U Bah Sanbor Shullai uba dei u Myntri Sorkar bad Chairman ka South Shillong Advisory Com-mittee u la leit ban ai jingthoh ha u Lat ka Jylla CH Vijayashankar ba un sangeh shuwa ban ai jingmynjur ïa ka Khasi Hills Autonomous Dis-trict (Trading by Non-Tribals) (Amendment) Bill, 2026, haba pynpaw ba kane ka aiñ ka long pyrshah ïa ka riti synshar bad shabar u pud treikam ka KHADC.
Ha ka jingthoh bala aiti sha u Lat ha ka sngi Nyngkong, u Bah Sanbor u la pyrshah ïa ka kyndon ba “pynlong kongsan ïa man ki nongaikam bar jylla ba kin don ïa ki Service Licence na ka bynta ka jingthungkam ïa ki bar jylla kiba dei na Jylla.
“Na ka bynta ka South Shillong Advisory, ngi wanrah sha ka jingpyntip ba kyrkieh sha phi ïa ka jingsngewkhia kaba jur haba ïadei bad ka Khasi Hills Autonomous District (Trading by Non-Tribals) (Amendment) Bill, 2026,” u la thoh.
“Ka dei ka jingpynpaw jong ngi ba kane ka Bill kala tam palat ïa u pud ka jingtreikam jong ka Council,” ong u Bah Sanbor haba pynpaw ba ka KHADC kala jam palat ïa ka bor treikam kaba la pynkup hapoh ka Paragraph 10 jong ka Sixth Schedule.
“Kane ka Bill kaba la mynjur da ka KHADC ka long palat ïa ka bor thawaiñ bala pynkup sha ki Autonomous District Council hapoh ka Paragraph 10 jong ka Sixth Schedule ka Riti Synshar bad kumta ka long pyrshah ïa ka Riti Synshar ka Ri India,” ong ka shithi.
U la pynksan ba ka aiñ ba nyngkong u snem 1954 ka dei kaba kren beit thik tang ïa ka jingbuh kyndon ha ka khaïi pateng.
“Ka Khasi Hills Autonomous District (Trading by Non-Tribals) Regulation Act, 1954 kala long aiñ ban pyrkhing ïa ka kam khaïi da ki bar jylla bad haba pyntreikam ïa ka, ki nongkhaïi bar jylla haduh mynta kila bud ïa ki aiñ bapher-bapher bad ki kyndon bala pyntreikam da ka Sorkar Jylla bad ki District Council,” ong u Bah Sanbor.
“Da ka jingpyrshang ban pynïar ïa u pud ban pynïaid naduh ki nongkhaïi shimet sha ki kompani/ki nongtrei shimet, ka KHADC kala jam sha u pud ba long shabar ka jingaibor ka Riti Synshar ka Ri,” u la ong haba bynrap ba ka jingai jingmynjur ïa kane ka Amendment Bill kan buh ïa ka Council ha ki jingma ban shah mudui mukotduma.
Haba khring ïa ka jingmut jong ka Paragraph 12 A jong ka Sixth Schedule, u Bah Sanbor u la pynpaw ba ki Aiñ ka Sorkar Jylla ki ïeng bad ki aiñ jong ki District Council ki ïap noh lada ki ïatyngkhuh.U Bah Sanbor u la ïeng skhem ha ka nongrim ba kane ka Bill ka pynkheiñ ïa ka hok tynrai jong ki nongshong shnong.
“Ka jinglah ban pyntreikam ïa ka Trading By Non Tribals kam dei satia ban long shaduh u pud ban pynïaid ïa ka jingïadei hapdeng ki nongaikam bad ki nongtei. Kane ka Bill ka dei ka jingpynkheiñ ïa ka Article 14, Article 19 (1)(g) bad Article 21 jong ka Riti Synshar ka Ri India,” u la ong.
U Bah Sanbor u la kam ruh ba kane ka Bill ka dei kaba la shna tang ban myntoi ha ki kam saiñ pyrthei.
“Kala paw shai ba ïa kane ka Bill la wanrah tang ban myntoi ha ka kam saiñ pyrthei, haba kyntait ïa ka jingshisha ba kam lah ban ïaid lait ïa ka jingshah bishar katkum ka riti synshar,” ong u Bah Sanbor.
Haba kyntu ïa u Lat ba un tuklar, u Bah Sanbor u la ong, “Halor kine ki jingshisha bad ki jingshong aiñ bala pynpaw haneng, ngi kyrpad ïa ka ophis jong phi ban bishar bha ïa ka jingbym biang katkum ki aiñ, ka jingbym don bor ban thaw ïa kane ka aiñ, bad ka jingpynkheiñ ïa ka Riti Synshar bad khatduh ban sangeh ai jingmynjur ïa ka Khasi Hills Autonomous District (Trading by Non-Tribals) (Amendment) Bill, 2026.”
