Shillong, Jylliew 29
Ka Jaiñtia Students’ Union (JSU) kala kyntu ïa ki nongshong shnong jong ka Elaka Nongkhlieh, kynthup ki paid Nongrep bad Trai jaka, ba kim dei ban pyndem ha ka jingtieng lane shah pyntieng hapdeng ki khubor ba byrngem byrsit ki “mafia’ ha ka thaiñ.
U General Secretary ka JSU samla Neilkee Mukhim u la ong, ïa kane ka jingkyrpad la wanrah hadien ka jingïalang bad ki nongshong shnong ka Elaka Nongkhlieh. “Hadien ka jingïalang bad ki nongshong shnong ka Elaka Nongkhlieh, kynthup ki nongrep bad trai jaka, ngi kwah ban kyrpad ïa ki paidbah, khamtam ki nongshong shnong ka Daistong, ba kim dei ban pyndem ha ka jingtieng lane shah pyntieng,” ong u samla Neilkee.
U la pynpaw ba ka seng kala ïoh ïa ki jingtip ïa kaei kaba long ba man mynta hapoh ka thaiñ. “Ngi la ïoh ïa ki jingtip ba ki nongshong shnong ka Elaka Nongkhlieh ki im hapdeng ka jingtieng namar ki jingbyrngem byrsit da ki katto katne ki mafia,” u la ong.
U samla Neilkee u la ong ba ka JSU bad ka Jaiñtia National Council kala kyrpad ïa ki nongshong shnong ba kin ïatylli kawei ha kaban ïada ïa la ka jong ka hok bad u la ai ruh ka jingkular ba ki ar tylli ki seng kin ïai don ryngkat bad kyrshan ïa ki.
Ka JSU kala kyntu ruh ïa ki nongshong shnong ba kin pynphriang ïa ki jingpynsngewthuh paidbah halor kane ka kam.
